Սակայն նա հավատում է Սերժ Սարգսյանի արդար դատաստանին:
Արմավիրի քաղաքապետի թեկնածու Սևակ Մինասյանը քիչ առաջ մեզ հետ զրույցում տեղեկացրեց, որ անձամբ իրեն էլ են ծեծի ենթարկել: Նրա խոսքերով, կոնկերտ մարդիկ, ովքեր փորձել են կանխել ընտրակաշառքը, ձերբակալվել են: Իսկ բողոքի գործողությունների դիմած ընտրազանգվածին և թիմակիցներին ևս տարել են ոստիկանություն:
«Երբ անձամբ փորձեցի բողոքի գործողություն անող ընտրազանգվածին հետ պահել, կանխել, այսինքն` արդեն կանխվել էր, ոստիկանության վարչության պետը սկսեց արդեն ֆիզիկական ուժ գործադրել: Անձամբ ինձ է հարվածել»,- պատմեց Սևակ Մինասյանը:
Քաղաքապետի թեկնածուն, գնահատելով ընտրությունների ընթացքը, նկատեց, որ ընտրությունները անցել են բացահայտ ընտրակաշառքներով և ընտրակեղծիքներով:
Կան հասցեներին վերագրանցված մարդիկ, և տվյալ բնակիչը չգիտի, թե իր տան վրա նոր բնակիչ կա գրանցված: Նրա խոսքերով, կոնկերտ դեպքեր կան գրանցված, որ նման կերպ մարդիկ ընտրության են մասնակցել:
Իսկ այն մարդիկ, ում տան վրա ապօրինի կերպով նոր գրանցումներ են եղել, իմանալով այդ մասին, հայտարարություն են պատրաստել, որը փոխանցվել է հանձնաժողովին:
Սակայն վերահաշվարկից հետո նոր միայն ամբողջական պատկերը պարզ կդառնա, թե քանի նման դեպքեր են եղել:
Մեր այն հարցին, թե ինքը վերահաշվարկից հետո դիմելո՞ւ է արդյոք Սահմանադրական դատարան, Սևակ Մինասյանն արձագանքեց.
«Ինչի՞ համար դիմենք Սահմանդրական դատարան. եթե թեկնածուն այսօր ծեծի է ենթարկվում, ինձ թվում է` առաջ գնալն այլևս իմաստ չունի»:
Իսկ այյն դիտարկմանը, թե կարելի՞ է ասել, որ այսօր իր անձի վերաբերյալ սպառնալիքներ կան, ավելացրեց. «Սպառնալիքներ կան ոստիկանության կողմից: Պարզապես ինձ թվում է, եթե երկրի նախագահը իմանա իրականությունը, այս ամենը կկանխվի: Իսկ այսօր ներքին օղակներից նրան ճիշտը չեն ներկայացնում: Եթե ճիշտը ներկայացնեն, ինձ թվում է` այս ամենը կկանխվի»: