«ՀԱԿ-ի հետ համագործակցության եզրի հնարավորություն տակավին տեսնում եմ, այո»,- Ազատության հրապարակում լրագրողների հետ հանդիպման ժամանակ հայտարարեց «Ժառանգություն» կուսակցության առաջնորդ Րաֆֆի Հովհաննիսյանը:
Հովհաննիսյանը նշեց, որ իր և Լևոն Տեր-Պետրոսյանի միջև ո՛չ հացադուլ անել-չանելու, ո՛չ էլ այլ թեմայով խոսակցություն չի եղել: Նրա խոսքերով, այդ ամենը հորինվածք է և լրատվամիջոցների հերյուրանքի արդյունք, ինչպես նաև հորինված են այն տեղեկությունները, թե իր կինը` Արմենուհին իր կողքին նստում ու ասեղնագործություն է անում:
Անդրադառնալով այն խոսակցություններին, թե Ազատության հրապարակ մտնելու համար ՀԱԿ-ն ու իշխանությունը եկել են պայմանավորվածության, Հովհաննիսյանն ասաց, թե Հայաստանում դավային տեսություններ շատ են տարածվում, և ինքը չի կարող Ազատության հրապարակ հանրահավաքի մասնակիցների մուտքից բխեցնել, որ հատուկ գործակցություն եղել է ՀԱԿ-ի ու իշխանության միջև:
«Առաջին նախագահն ինքն իր ելույթում գործարք եզրը օգտագործեց, ես չէ, որ այդ պետք է մեկնաբանեմ»,- ասաց նա` հավելելով. «Ամեն ինչ չէ, որ քաղաքական դաշտում սև ու սպիտակ է», ու չբացառեց, որ այդ օրերին Երևանում ԵԽ պատվիրակությունը իր վրա է վերցրել որոշակի միջնորդական առաքելություն, որի արդյունքը եղավ դա:
«Եթե դա է, որևէ վատ բան չկա, ես գիտեմ մտահոգությունները, գիտեմ, որ մարդիկ մեկնաբանում են պահի տակ և չեն վերցնում ընդդիմադիր ելույթների ամբողջ դիմաշարը, բայց բոլոր դեպքերում ես կարծում եմ, որ ամեն մեկը պետք է հավատարիմ լինի ինքն իրեն»: