Ռուսաստանի Ստավրոպոլի երկրամասի Լիսոգորսկայա բնակավայրում հայ ընտանիքի նկատմամբ իրականացված դաժան հաշվեհարդարը բացահայտվել է: Հայ ֆերմերի երկու երեխաներին սպանել են Ստավրոպոլ երկրամասի Պյատիգորսկ քաղաքի 18-ամյա երկու երիտասարդներ՝ Եվգենի Կոլոմիյցևն ու Դմիտրի Սուշենկոն, որոնցից մեկը ձերբակալվել էր շատ ավելի վաղ մեկ այլ քրեական գործի շրջանակներում՝ մեղադրվելով թմրանյութերի ապօրինի ձեռքբերման և տարածման, ապա նաև մեքենայի հափշտակման մեջ: Նրանցից երկուսի դեպքում էլ որոնողական աշխատանքների ընթացքում ապօրինի զենք էր հայտնաբերվել:
«Առաջին լրատվական»-ի հետ զրույցում այս մասին մանրամասներ փոխանցեց Ստավրոպոլում բնակվող հայ ֆերմեր Խաչատուր Ղազարյանը: Նա նշեց, որ այդ շրջանում իր ֆերմայից ութ հորթ է վաճառել: «Իմացել են, թե տանը մեծ ունեցվածք ունեմ, և կարելի է գալ ու մեծ չափերի գողություն անել: Իմացել են, թե տանը նվերներ ունեմ, կարող են գալ՝ վերցնել»,- ասաց նա՝ հավելելով, թե անիմաստ է քննարկել բացահայտման ողջ ընթացքը, քանի որ ամեն ինչ արդեն ավարտվել է:
Եզրափակելով՝ Խաչատուր Ղազարյանը նշեց, որ մոտ ապագայում ցանկանում է գալ Հայաստան և նորածին երեխա որդեգրել, եթե հնարավոր լինի: Նա ակնկալում է, որ տեղի իշխանություններն իրեն ու կնոջը կաջակցեն ընտանիքը համալրելու և իրենց առօրյան կյանք վերադարձնելու իր ցանկությունն իրագործելու հարցում:
Հիշեցնենք, որ անհայտ անձը ներխուժել էր ազգությամբ հայ ֆերմեր Խաչատուր Ղազարյանի տուն և գնդակահարել նրա ընտանիքի անդամներին: Արդյունքում նրա երեխաները՝ 16-ամյա Արսեն Ղազարյանը և 11-ամյա Լիանա Ղազարյանը, մահացել էին ստացած հրազենային վնասվածքներից, իսկ նրանց մայրը՝ Թամարա Ղազարյանը, վիրավորվել էր:
Ոստիկանության նախնական տեղեկություններով՝ հանցագործը հայ ֆերմերի տուն էր ներխուժել տանիքով և վերնահարկով: Մուտք գործելով Ղազարյանների հյուրասենյակ, որտեղ բազմոցին քնած են եղել Արսեն և Լիանա Ղազարյանները, հանցագործը կարծել է, թե նրանք ծնողներն են, և մի քանի կրակոց է արձակել: Ինչպես տեղեկացրել էր ռուսական Lifenews-ը, աղմուկից սենյակ էր մտել երեխաների մայրը՝ Թամարա Ղազարյանը, իսկ հանցագործը հասկանալով, որ սխալվել է, կրակել էր նրա ուղղությամբ և փախել, սակայն արձակված փամփուշտը մնացել էր տուժողի ատամի մեջ: Հանցագործը եղել էր դիմակավորված: Հարուցվել էր քրեական գործ սպանության և ապօրինի զենքի շրջանառության հատկանիշներով:
