Ռուսաստանի նախագահը այլևս չի կարող արդարանալ համաշխարհային հանրության աչքում. նա հիանալի գիտի, որ մալայզիական ինքնաթիռը խփել են անջատողականները՝ Ռուսաստանից և նրա քաղաքական երաշխավորությամբ ստացված սպառազինությամբ: Այս մասին Gordon պարբերականին տված էքսկլյուզիվ հարցազրույցում հայտարարել է ռուս քաղաքագետ, սոցիոլոգ և հրապարակախոս Ստանիսլավ Բելկովսկին:
«Արդյունքում Ուկրաինայի վերաբերյալ Պուտինի բոլոր ծրագրերը պայթել են Boeing-ի հետ միասին, քանի որ նա այժմ արդեն չի կարող համաշխարհային հանրության աչքում լավը երևալ: Հիմարություն կլինի ասել, թե նա գործել է՝ ելնելով ռուս բնակչության շահերից և պաշտպանությունից, քանի որ այդ նպատակով ընդհանրապես հարկավոր չէր ինքնաթիռ խփել: Ուստի նա կատաղած է, իսկ Կրեմլում խուճապ է տիրում»,- ասել է քաղաքագետը:
Բելկովսկու եզրակացության հիմքում տեղի ունեցածի վերաբերյալ Ռուսաստանից հնչող չափազանց տարբեր վարկածներն են:
«Կատարվածի վերաբերյալ այնտեղից զանազան տարբերակներ են հնչում, նույնիսկ անհեթեթ, այն մասին, որ փորձել են խփել նաև Պուտինի ինքնաթիռը: Չեմ զարմանա, եթե նրանք ասեն, որ հրաձիգը փորձել է խփել Պուտինի ինքնաթիռը, որպեսզի զբաղեցնի նրա տեղը և Ռուսաստանի նախագահ դառնա»,- համոզված է Ստանիսլավ Բելկովսկին: