Երևանի քաղաքապետ Կարեն Կարապետյանը Հանրային խորհրդի լիագումար նիստի ժամանակ, անդրադառնալով բարձրացված հարցերին և մասնավորապես քաղաքային տրանսպորտի խնդիրներին, նշեց, որ Երևան քաղաքի համար իդեալական տրանսպորտային համակարգ ստեղծելու համար պետք է կարգավորել կանգառների հարցը:
Կարապետյանը նշեց, որ այժմ Երևանում կա 700 կանգառ և չորս տիպի տրանսպորտ և անհրաժեշտ է պարզել, թե արդյոք պե՞տք է այս բոլոր կանգառներում էլ ունենալ չորս տիպի տրանսպորտ, թե՞ ոչ:
Նրա խոսքերով, ներկայումս Երևանում 2800-ից ավել միկրոավտոբուս կա, և միանշանակ է, որ այդքանը անհրաժեշտ չէ: Քաղաքապետը տեղեկացրեց, որ շուտով անցում է կատարվելու մեծ և միջին
ավտոբուսների համակարգին, և իրենք այդ մասին արդեն տեղեկացրել են միկրոավտոբուսների ընկերություններին:
Ավելին` Կարեն Կարապետյանը նշեց, որ «առաջին գիշերվա իրավունքը» տալիս են միկրոավտոբուսների ընկերություններին և նրանց հնարավորություն են տվել հայտեր ներկայացնելու:
Կարեն Կարապետյանը նաև նշեց, որ որոշ ժամանակ անց անցում է կատարվելու միասնական վճարման համակարգի, որտեղ լինելու են համապատասխան աբոնեմենտներ, որով հնարավոր կլինի ապահովել ֆինանսական հոսքերը:
