Մարքսիստական կուսակցության նախագահ Դավիթ Հակոբյանը, որը Մաքսային և Եվրասիական տնտեսական միությունների մեծ ջատագով էր, այժմ մեծ խնդիրներ է տեսնում այդ միությունների կայանալու հարցում:
Ինչ վերաբերում է այն հարցին, թե ինչու է ուշանում Հայաստանի անդամագրումը Եվրասիական տնտեսական միությանը, «Առաջին լրատվական»-ի հետ զրույցում Դավիթ Հակոբյանը ասաց․ «Ռուսաստանն ուզում է առանձին դիվանագիտական փոխհարաբերություններ Արցախի Հանրապետության հետ, և այն 15 օրվա ժամանակը, որ խնդրել էր ՀՀ նախագահը, այն բանի համար էր, որ Արցախի Հանրապետությանն առանձին դիվանագիտական սուբյեկտ ճանաչեն, և Հայաստանը, նրանց զիջելով իր տեղը, բանակցային գործընթացից դուրս գա: Բայց դրա փոխարեն նախագահը ԱԺ-ն արձակուրդ ուղարկեց․ահա թե ինչու հուլսի 3-ին Հայաստանը չանդամագրվեց Եվրասիական տնտեսական միությանը»:
Նրա խոսքով՝ առանց Ուկրաինայի և առանց գաղափարական հենքի՝ ուտոպիա է և անիրականանալի հանգամանք Եվրասիական տնտեսական միության կայանալն առհասարակ․ «Ես թմբկահարողն ու ողջունողն էի, բայց Պուտինն այսօր պատրաստ չէ այդ միության ո՛չ գաղափարախոսությունը տալու, ոչ էլ ուստավը: Առնվազն հիմարություն է ճանապարհային քարտեզ հասկացությունը»,-ասաց մարքսիստը:
Դավիթ Հակոբյանի դիտարկմամբ՝ մենք այդ միությունում հիմա անելիք չունենք, և խոսել այն մասին, թե այն հետագայում մեր երկրի տնտեսության զարգացման հարցում էական կլինի՝ հիմա ոչ ոք իրավասու չէ հորջորջել:
Մեր զրուցակիցն անդրադարձավ նաև բարերար Լևոն Հայրապետյանի ձերբակալությանը և նկատեց, որ Ադրբեջանը չնչին հասկացություն է այդպիսի պատվերներ տալու համար: «Ընդհանրապես, օլիգարխիկ կապիտալը՝ ուզում է այդ օլիգարխը նախագահ լինի թե ներքևում, առանց քրեական անցյալի, առանց քրեական պոչի չի լինում: Ասում են, թե նա կատարեց Խոդորկովսկու սխալը՝ հայկական հարցով հանդիպեց Օբամայի հետ՝ լինելով ռուսահպատակ. առանց բարձրագույն ծառայությունների՝ նա այդ քայլին իրավունք չուներ դիմելու: Այո, նա կատարեց Խոդորկովսկու սխալը, բայց դա վճռորոշ չէր: Հարցն այն է, որ հայ-ռուսական միջպետական փոխհարաբերությունների, հայ-ռուսական դիվանագիտության սառեցված իրավիճակում Պուտինը դրեց, այսպես կոչված, հայական ծագման օլիգարխների որսը որպես քաղաքական լծակ՝ Հայաստանին մի երկրորդ անգամ զգուշացնելու, որ Ազգային ժողովում քննարկի ու դուրս գա բանակցային գործընթացից»:
Դավիթ Հակոբյանի հետ հարցազրույցն ամբողջությամբ՝ մեր տեսանյութում:
