Իսրայելի լրատվամիջոցները, վկայակոչելով Քնեսեթի նախագահի գրասենյակին, հաղորդել են, որ Իսրայելի օրենսդիր մարմնի ղեկավար Ռիվեն Ռվլինը իր վրաց գործընկեր Դավիթ Բաքրաձեին խնդրել է հետաձգել իր այցը Իսրայել` «որոշ ներքին ու արտաքին հանգամանքների պատճառով», ինչպես նաև Իսրայելի քաղաքացի Ռոն Ֆուկսի ճակատագրի առնչությամբ, ում Վրաստանում կաշառք տալու մեղադրանք է առաջադրված: Վերջինը հատկապես «շատ է մտահոգում Իսրայելի քաղաքացիներին, ուստի տվյալ պահը հարմար չէ պաշտոնական այցի համար»:
Վրաստանի արտաքին գործերի նախարար Գրիգոլ Վաշաձեն այս առնչությամբ հայտարարել է, թե խորհրդարանի նախագահ Դավիթ Բաքրաձեի ծրագրված այցի հետաձգումը Իսրայել կարող է ազդել երկկողմ հարաբերությունների վրա: Վաշաձեն նաև նշել է, որ պատճառներ կարող են էլի բերվել` սկսած Քնեսեթի նախագահի աշխատանքային լարված գրաֆիկից մինչև Պաղեստինի հետ սկսվող բանակցությունները, սակայն նաև շեշտել է, թե այցը «չեղյալ չի հայտարարված»:
Հիշեցնենք, որ Իսրայելի քաղաքացի Ռոն Ֆուկսին, ով երկարատև և միլիոնների հասնող առևտրային վեճի մեջ է Վրաստանի հետ, և նրա գործընկեր Զայև Ֆրենկիլին վրաց իրավապահները ձերբակալել էին Բաթումում` Վրաստանի ֆինանսների փոխնախարար Ավթանդիլ Խարայիձեի հետ հանդիպմանը, ում նրանք կաշառք էին առաջարկել` Միջազգային արբիտրաժում իրենց գործը չներկայացնելու դիմաց:
