Սերժ Սարգսյանը երեկ հրամանագիր է ստորագրել Աղվան Հովսեփյանին Քննչական կոմիտեի նախագահ նշանակելու մասին: Դատախազության դուռը համբուրելով հեռացած Աղվան Հովսեփյանը փաստորեն վերադառնում է: Սակայն նրա վերադարձը այնքան էլ գրանդիոզ չի ստացվում, քանի որ Քննչական կոմիտեն իր նախնական տեսլականի համեմատ բավական տխուր է ստացվում:
Եթե նախկինում պլանավորվում էր ստեղծել քննչական սուպերկառույց, ապա այսօր այդ կոմիտեն ընդամենը ներառում է Ոստիկանության և ՊՆ քննչական լիազորությունները, իսկ ավելի կարևոր՝ հարկային ծառայության քննչական լիազորությունները, ԱԱԾ քննչական լիազորությունները և Հատուկ քննչական ծառայության լիազորությունները Աղվան Հովսեփյանի ձեռքից դուրս են մնում: Այսպիսով, սուպերկառույց ստացվելու փոխարեն, ըստ էության` ստացվում է հերթական կառույց: Այսինքն` Աղվան Հովսեփյանը բոլորից մեկ աստիճան վեր կանգնելու փոխարեն, ընդամենը դառնում է մեկը բոլորից:
Այսինքն` Սերժ Սարգսյանը սրանով, ըստ էության, ձևավորում է իշխանական համակարգում մեկ ավելորդ ուժային կենտրոն, ընդհանուր բալանսի և բազմազանության համար: Այլ կերպ ասած` Սերժ Սարգսյանը ավելացնում է իր կշռաքարերի քանակը` հարկ եղած դեպքում իր նժարը ծանրացնելու համար: Իսկ նժարը ծանրացնելու առիթներ կամ անհրաժեշտություն նա, իհարկե, առաջիկայում բավականաչափ զգալու է, երբ ավելի ու ավելի մոտենան խորհրդարանական և նախագահական ընտրությունները, սահմանադրական փոփոխությունների հանրաքվեն, և եթե իհարկե` այս ամենից առաջ էլ արտահերթ ընտրական զարգացումներ չլինեն:
Հերթական, թե արտահերթ` գործընթացները, ըստ էության, սրելու են ներհամակարգային բախումները տարբեր թևերի միջև՝ մի կողմից Հովիկ Աբրահամյանը, մյուս կողմից` Ռոբերտ Քոչարյանը, Գագիկ Ծառուկյանը նրանցից որևէ մեկի հետ, մեկ այլ կողմից` յուրային օլիգարխները, միաժամանակ նաև ուժային կառույցները իրենց տարբեր շահերով:
Այսպիսով, Աղվան Հովսեփյանը Սերժ Սարգսյանի կարևոր բևեռներից մեկն է դառնում, և այստեղ առանցքայինը ոչ այնքան նրա տնօրինած կառույցի քննչական լիազորություններն են,- այստեղ, ըստ էության, ապահովվում է ուժայինների բալանսավորվածությունը՝ տարբեր ֆունկցիոնալ լիազորությունների համադրությամբ,- այլ ավելի շատ Աղվան Հովսեփյանի, այսպես ասած, վարչական-հասարակական ռեսուրսը, որ նա տնօրինում է որպես «Նիգ Ապարան» հասարակական կազմակերպության պատվավոր նախագահ, որպես մի շարք այլ հասարակական նախաձեռնությունների առաջնորդ: Աղվան Հովսեփյանին փայփայելը Սերժ Սարգսյանի համար կարևոր է հենց այս` ոչ մասնագիտական-ուժային իմաստով:
