Ճապոնիայում տեղի ունեցած երկրաշարժի հնարավոր հետևանքները քննարկելու և գործողություններ առաջարկելու նպատակով այսօր տեղի ունեցավ Երևան-Մոսկվա-Կիև տեսակամուրջ`«Բնական և տեխնածին աղետների հետևանքները» թեմայով:
«Երկրաշարժի էպիկենտրոնից 20-30 կմ տրամագծով կա ռադիացիոն իրավիճակի վատթարացման վտանգ: Իհարկե, ռադիացիան այնքան մեծ չէ, որքան Չեռնոբիլի դեպքում, սակայն այն բավական բարձր է. 6-րդ աստիճանի` ըստ «ՄԱԳԱՏԷ»-ի սանդղակի»,- ասաց Կիևի տաղավարի հյուր Ուկրաինայի ԳԱԱ Երկրաֆիզիկայի ինստիտուտի փոխտնօրեն Ալեքսանդր Կենձերան:
«Այժմ տարածված է ցածր աստիճանի ռադիացիա, ինչը 5-6 տարի հետո մարդկանց մոտ կարող է հանգեցնել տարբեր հիվանդությունների, այդ թվում` քաղցկեղի առաջացման: Այժմ բազում բժշկական ինստիտուտներում անցկացվում են փորձեր, որոնք նպատակ ունեն ստեծել դեղամիջոցներ մարդու օրգանիզմի վրա ռադիացիայի ազդեցությունը նվազագույնի հասցնելու համար»,- ասաց Չեռնոբիլի ԱԷԿ-ում աղետի վերացման օպերացիայի մասնակից Վլադիմիր Տոկարևսկին:
Երևանի տաղավարից տեսակամուրջին մասնակցող ՀՀ ԳԱԱ ինժեներական սեյսմոլոգիայի ինստիտուտի տնօրեն Սևադա Հովհաննիսյանը նշեց, որ շուտով Հայաստանում ստեղծվելու է նոր ատոմակայան, որի կառուցման համար հաշվի է առնվելու Ճապոնիայի փորձը, հնարավոր աղետների արդյունքում ռադիացիայի վտանգը նվազագույնի հասցնելու համար: