Ընտրություններին պետք չէ մասնակցել, որովհետև երկիրն օկուպացված է, որովհետև բռնապետության օրոք չկա ընտրություն, որովհետև ժողովուրդը քվեարկում է, իսկ գողերը՝ հաշվում: Նման կարծիք «Առաջին լրատվական»-ի հետ զրույցում հայտնեց «Սարդարապատ» շարժման նախաձեռնող խմբի համակարգող, Շուշիի առանձնակի գումարտակի նախկին հրամանատար Ժիրայր Սեֆիլյանը՝ պատասխանելով հարցին՝ մասնակցելո՞ւ են արդյոք ընտրություններին, թե՞ բոյկոտելու.
«Անհրաժեշտ է գիտակցել, որ պետք է հեռու մնալ առկա քաղաքական կեղտաջրից, չօժանդակել կրիմինալի վերարտադրությանը ու վերջնականապես արձանագրել, որ գործող վարչակազմը չի ձևավորվել ընտրություններով, ուստի նրանց հեռացումը նույնպես չի լինելու ընտրությունների միջոցով:
Սակայն չմասնակցելու մեր հորդորը պետք չէ ընկալել որպես դասական բոյկոտ, որովհետև մենք շատ լավ տեղեկացված ենք հակառակորդի կեղծելու հնարավորություններին, և մեր ժողովրդի մեծամասնության բոյկոտի դեպքում իսկ նրանց հաջողվելու է կեղծել և՛ ընտրությունները, և՛ բոյկոտի արդյունքները՝ համապատասխան բեմականացմամբ ապահովելով իրենց հերթական վերարտադրությունը:
Ուստի, գիտակցելով հակահայ ռեժիմի կողմից թելադրված խաղի կանոնների շրջանակներում նրանց վերարտադրությունը կանխելու անհնարինությունը, անհրաժեշտ է ոչ միայն բոյկոտել ընտրությունները, այլև արհամարել այդ ամենը՝ լծվելով այլընտրանքային ընտրությունների կազմակերպման միջոցով զուգահեռ իշխանության ձևավորման աշխատանքներին, որն ուշ թե շուտ համայն հայության ջանքերի շնորհիվ փոխելու է առկա կառավարման համակարգը:
Եվ ինչպես տեղեկացված եք, հուրախություն բոլորիս, արդեն իսկ տրված է այս քաղաքական նոր գործընթացի մեկնարկը՝ ի դեմս «Նախախորհրդարան» նախաձեռնության»,- ասաց Ժիրայր Սեֆիլյանը: