Համաձայն կառավարության երեկվա որոշման՝ այսուհետ Սևանից ոռոգման նպատակով բաց կթողնվի 245 մլն լիտր ջուր՝ 170 մլն լիտրի փոխարեն: Ըստ կառավարության հիմնավորման՝ Սևան-Հրազդան ոռոգման-էներգետիկ համակարգից սնվող ոռոգելի հողերը 2014թ. ոռոգման շրջանում անխափան ջրամատակարարմամբ ապահովելու նպատակով անհրաժեշտություն է առաջացել կառավարության 2014 թվականի ապրիլի 23-ի «Ոռոգման նպատակով 2014 թվականին Սևանա լճից ջրառի մասին» որոշման մեջ կատարել համապատասխան փոփոխություն՝ սահմանելով մինչև 245 մլն խորանարդ մետր:
Ըստ այդմ՝ իրավիճակը հիմնականում պայմանավորված է Հրազդան գետով նախատեսված բնական ելքերի նվազմամբ, Ապարանի ջրամբարից տրվելիք դոտացիայի անհնարինությամբ և ջրօգտագործողների կողմից ջրապահանջարկի ապահովմամբ:
Մինչև հուլիսի 15-ը Սևանա լճից ջրառը կազմել է շուրջ 162.5 մլն խորանարդ մետր: Համաձայն ներկայացված հայտերի՝ մինչև սույն թվականի հուլիսի 21-ը Սևան-հրազդանյան համակարգից սնվող ոռոգման ջրանցքներից ջրառի պահանջարկը արդեն իսկ կգերազանցի կառավարության 2014 թվականի ապրիլի 23-ի «Ոռոգման նպատակով 2014 թվականին Սևանա լճից ջրառի մասին» որոշմամբ սահմանված 170 մլն խորանարդ մետրը:
Համաձայն «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» ՀՀ օրենքի 1-ին հոդվածով հաստատված 2014 թվականի Սևանա լճից ջրի բացթողնման տարեկան առավելագույն չափաքանակի փոփոխության վերաբերյալ ժամանակավոր ծրագրի՝ սույն թվականի հուլիսի 17-ից մինչև օգոստոսի 16-ը Սևան-հրազդանյան համակարգից սնվող ոռոգման ջրանցքներից ջրառի կանխատեսումը կազմում է հավելյալ 75 մլն խորանարդ մետր:
Ուստի մինչև սույն թվականի օգոստոսի 16-ը համակարգում անխափան ջրամատակարարում իրականացնելու նպատակով նախկինում հաստատված ջրաքանակը կառավարությունն ավելացնում է 75 մլն խորանարդ մետրով:
Հաշվի առնելով 2014թ. ոռոգման շրջանի ընթացքում արձանագրված բնակլիմայական պայմանները՝ ՀՀ Ազգային ժողովի կողմից ընդունվել է «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» ՀՀ օրենքը, համաձայն որի՝ 2014թ. ոռոգման շրջանի ընթացքում Սևանա լճից ջրառը նախատեսվում է իրականացնել մինչև 270 մլն խորանարդ մետր ջրաքանակի սահմաններում:
Նախագիծը մշակել է ՀՀ տարածքային կառավարման նախարարության ջրային տնտեսության պետական կոմիտեի աշխատակազմը:
