Այսօր «Հայելի» ակումբում հրավիրված մամլո ասուլիսի ժամանակ անդրադառնալով ԵՊՀ պատմության ֆակուլտետի դեկան Էդիկ Մինասյանի հեղինակած պատմության դասագրքի երրորդ հատորին (որում ներկայացվում են մարտիմեկյան ողբերգական իրադարձությունները)` լեզվաբան Դավիթ Գյուրջինյանն ասաց.
«Իմ կարծիքը հայտնել եմ, և այն համացանցում արդեն իսկ տարածում է գտել: Մեկ անգամ ևս կրկնեմ՝ ինձ թվում է, որ չորս տարվա վաղեմության դեպքերը, որին տասնյակ հազարավոր մարդիկ են մասնակցել, և որի շուրջ գնահատականները տարբեր են, պետք չէր բուհական դասագիրք մտցնել միայն մեկ տեսակետով: Այդ մեկ տեսակետն էլ, ինչպես պարզվեց, իշխանական վարկածն էր:
Պետք էր ձեռնպահ մնալ նման գիրք հրատարակելուց: Ճիշտ կհամարեի, եթե գրեին՝ այսինչ օրը եղան ընտրություններ, բախումներ և վերջ: Ինձ դուր չի գալիս նաև, որ ասում են` հեղինակն իր սուբյեկտիվ կարծիքն է հայտնել: Մարդը կարող է սուբյեկտիվ կարծիք ունենալ, բայց ոչ հրատարակել դրանք բուհական դասագրքում: Պատմությունը պետք է, որքան հնարավոր է, անկողմնակալ լինի»:
Գրականագետ Դավիթ Գասպարյանն էլ անդրադառնալով նույն հարցին` ասաց. «Պետք է արտացոլվեր առանց վերաբերմունքի: Եթե խոսակցության տեղիք է տալիս, ուրեմն սխալ է ներկայացվել: Նման գործը պետք է վերահսկվեր: Հեղինակը կարող է կուսակցական լինել, իր կարծիքն ունենալ իրադարձությունների շուրջ, բայց գրքում նման կերպ ներկայացնելը սխալ է»:
