CNN Türk-ի հաղորդմամբ, Թուրքիայի վարչապետ Ռեջեփ Թայիփ Էրդողանը, այսօր ելույթ ունենալով իր գլխավորած «Արդարություն և զարգացում» կուսակցության (ԱԶԿ) խորհրդարանական խմբակցության նիստում, պատասխանել է Լիբիայի շուրջ իր հասցեին հնչած քննադատություններին.
«Այժմ մեր երկրում շատ են շահարկում այն, թե ինչո՞ւ է Եգիպտոսում տեղի ունեցած իրադարձությունների ժամանակ իր ձայնը բարձրացրած վարչապետն այժմ լռում: Պետք է նշել, որ դրանք առաջացել են անտեղյակության արդյունքում:
Թուրքիան երբեք զենք չի բարձրացնի լիբիական ժողովրդի վրա (կարծես թե ժամանակին չի վարվել նման կերպ): Մենք լավ գիտենք, թե որտեղ և ինչ ենք ասել: Վերջապես, մենք ոչ թե մթերային խանութ ենք աշխատեցնում, այլ Թուրքիան ենք կառավարում:
Լիբիայի հարցում Թուրքիայի վերջնական դիրքորոշման մասին մենք կհայտարարենք ՆԱՏՕ-ի նիստում, որից հետո հանրությունը կտեղեկացվի այդ մասին»:
Հիշեցնենք, որ երեկ Էրդողանը, ելույթ ունենալով Մեքքայի համալսարանում, ՆԱՏՕ-ին ազդարարել էր թուրքական 4 նախապայմանների մասին. Լիբիան պատկանում է լիբիացիներին, Լիբիայի հանքավայրերն ու հարստությունները պետք է պատկանեն նրա ժողովրդին, Արևմտյան կոալիցիայի գործողությունը չպետք է վերածվի օկուպացիայի, և վերջապես՝ Լիբիայի ժողովրդին պետք է ինքնուրույն վճիռներ կայացնելու հնարավորություն ընձեռվի:
Ինչ վերաբերում է Եգիպտոսում տեղի ունեցած իրադարձությունների ժամանակ Էրդողանի լրիվ այլ դիրքորոշմանը, ապա չպետք է մոռանալ, որ Եգիպտոսի նախկին նախագահ Հոսնի Մուբարաքն ընդհանրապես չէր սիրում Թուրքիան` վերջինիս դիտելով որպես մրցակից իսլամական աշխարհում: Բացի այդ, Եգիպտոսը հանդիսանում էր վերջին շրջանում Թուրքիայի հետ բավականին լարված հարաբերություններ ունեցող Իսրայելի միակ տարածաշրջանային դաշնակիցը, ինչը, բնականաբար, դուր չէր գալիս Էրդողանին:
