Երեկ Ուկրաինայի հարավ-արևելքում` Դոնեցկի մերձակայքում, վթարի է ենթարկվել «Մալայզիական ավիաուղիների» Բոինգ 777 օդանավը, որը կատարում էր Ամստերդամ-Կուալա Լումպուր չվերթը: Օդանավի մեջ գտնվող բոլոր 295 մարդիկ զոհվել են՝ 280 ուղևոր և 15 հոգի անձնակազմ: Այս ողբերգությունը տեղի է ունեցել Ուկրաինայի արևելքի, ըստ էության, պատերազմական գոտում, որտեղ ռուսամետ անջատողականները պայքարում են ուկրաինական զինուժի դեմ:
Պաշտոնական Կիևի ներկայացուցիչները հայտարարել են, որ օդանավին միգուցե հենց անջատողականներն էլ հարվածել են: Անջատողականների ներկայացուցիչները հերքել են մեղադրանքերը: Ասվում է, որ Բոինգ 777-ին հարվածել են «Բուկ» գերժամանակակից զենիթային համալիրով, և անջատողականները մի քանի օր առաջ հպարտացել են իրենց ձեռքի տակ նման համալիրի առկայությամբ, ինչպես նաև խփել են մի քանի ուկրաինական ռազմական օդանավեր: Հավանական է, որ մալայզիական Բոինգն էլ շփոթել են ռազմական օդանավի հետ, համարել են ռազմական օդանավ:
Իհարկե, սա ողբերգության վարկածներից մեկն է, միգուցե ամենահավանականը, միգուցե կան այլ վարկածներ, և քիչ հավանական թվացող տարբերակները կարող են իրականում լինել:
Առայժմ ողբերգության մասին հստակ և պաշտոնական տեղեկություններ չկան, կամ հստակ է միայն այն, որ զոհվել է 295 մարդ, և դժբախտաբար, կարող ենք ասել, որ այդ մարդիկ հանդիսանում են ուկրաինական ճգնաժամի զոհերը: Այսինքն` ուկրաինական ճգնաժամի զոհերի թիվը արդեն ավելացել է 295-ով: Սա աննկարագրելի մարդկային աղետ է, որի դեպքում մեկնաբանություններն իսկապես ավելորդ են:
Ուկրաինական մսաղացը, որ, ըստ էության, հրահրեց Ռուսաստանը այդ երկրի եվրաինտեգրացիոն քաղաքականությունն արգելակելու և ուկրաինացիների ինքնիշխանությունը սահմանափակելու համար, չափազանց թանկ է նստում անգամ այդ մսաղացից ֆիզիկապես հազարավոր կիլոմետրեր հեռու գտնվող մարդկանց վրա՝ լինեն նրանք օդում, թե ցամաքում:
Եվ այս կապակցությամբ շատերն են երեկ հիշել նաև Խորհրդային Միության ռազմաօդային ուժերի սարսափելի հանցանքը 1983 թվականին, երբ օդում ոչնչացվեց հարավկորեական մարդատար ինքնաթիռը, ինչին զոհ գնացին ինքնաթիռում եղած 250-ից ավելի մարդիկ: Այս միջադեպից հետո աշխարհը ԽՍՀՄ-ը կնքեց «չարիքի կայսրություն»:
Ուկրաինական մսաղացը կայսրությունը վերականգնելու պուտինյան հավակնությունների ապոգեյն էր, և անկախ նրանից, թե ինչն է հատկապես օդանավի աղետի պատճառը կամ ով է իրականում հարվածել ինքնաթիռին, սարսափելիորեն ակնհայտ է, որ կայսրությունը դեռ չվերականգնված` այն արդեն իսկ հսկայական չարիք է ծնել, ու կարելի է պատկերացնել, թե ինչ կարող է լինել, եթե հանկարծ Պուտինին հաջողվի վերականգնել կայսրությունը:
