Ադրբեջանական 1news.az լրատվական կայքի հաղորդմամբ, ադրբեջանցի քաղաքագետ Թոֆիկ Աբբասովը, անդրադառնալով Լիբիայում ստեղծված իրավիճակին, հայտարարել է, որ Երրորդ համաշխարհային պատերազմի մեկնարկն արդեն իսկ տրված է.
«Արևմտյան կոալիցիայի կողմից Լիբիայի դեմ ռազմական գործողություններ սկսելը նոր մարտահրավեր է մնացած ողջ աշխարհին: Արաբական երկրի վրա հարձակում ձեռնարկելու որոշումը վկայում է այն մասին, որ ՄԱԿ-ը, միջազգային իրավունքը և նմանատիպ բաներն Արևմուտքի համար միայն պատրվակ են սեփական պլաններն առաջ մղելու համար:
Ձևականորեն արևմտյան կոալիցիայի ուժերն ավիացիոն և հրթիռային հարվածներ են հասցնում ռազմական և այլ օբյեկտներին, որպեսզի պաշտպանեն Քադաֆիի կուրսից դժգոհ բնակչությանը: Մինչդեռ իրականում զոհվում են կանայք, երեխաներ, մի խոսքով` անմեղ մարդիկ: Նմանատիպ իրադարձությունների մենք արդեն ականատես ենք եղել Հարավսլավիայում, Աֆղանստանում, Պակիստանում, Իրաքում:
Սակայն չեմ կարծում, թե գործը կհասնի ցամաքային օպերացիաներին: Ամենայն հավանականությամբ, Քադաֆիի ավիացիան և զրահատանկային ուժը կոչնչացվեն, որից հետո լիբիական ընդդիմությունը նոր արշավ կձեռնարկի դեպի Տրիպոլի Քադաֆիին գահընկեց անելու համար:
Պետք է ուշադրություն դարձնել այն բանին, որ Արևմտյան կոալիցիան այս գործընթացում ներգրավվեց միայն այն ժամանակ, երբ տեսավ, որ լիբիական ընդդիմության ուժերն արդեն հյուծված և սպառվելու վրա են: Եվրո-ամերիկացիների նետն արձակված է դեպի թիրախը, և այն կհասնի իր նշանակետին:
Արևմուտքին անհրաժեշտ է երրորդ աշխարհի աչքում վերականգնել ուժեղ բևեռ լինելու իր սասանված հեղինակությունը: Մյուս կողմից էլ Վաշինգտոնի գլխավորած արևմտյան կոալիցիան այս հարցում չի ցանկանում հոգեբանական ճնշում գործադրել իր պոտենցիալ հակառակորդների` Չինաստանի, Հնդկաստանի, Բրազիլիայի, Թուրքիայի, ինչպես նաև Ռուսաստանի վրա, որոնց շունչը համաշխարհային գերիշխանության հարցում նա արդեն զգում է իր թիկունքին:
Բացի այդ, Արևմուտքի հիշյալ, այսպես կոչված, դեմոկրատական մարշը կարող է դաս դառնալ մյուս ըմբոստ երկրների` Իրանի, Հյուսիսային Կորեայի, Սիրիայի համար: Սա կարող է հանդիսանալ Իրանին ռազմական հարված հասցնելու նախերգանք, սակայն Արևմուտքը շատ զգույշ պետք է լինի Իրանի հարցում, քանի որ Իրանը Լիբիա չէ: Իրանը մեծ պոտենցիալ ունի թե՛ սովորական, թե՛ անհամաչափ պատերազմներ վարելու համար:
Իմ կարծիքով, Երրորդ համաշխարհային պատերազմն արդեն իսկ ընթանում է, և հարկավոր է խոսել Չորրորդ համաշխարհային պատերազմի սկսվելու հավանականության մասին, որը, ըստ էության, կհանդիսանա պատերազմ բոլորը բոլորի դեմ»:
