Այսօր ոստիկանությունում կայացավ մասնավոր պահնորդական գործունեության իրականացման` ՀՀ ոստիկանության լիցենզավորող հանձնաժողովի առաջին նիստը, որի ժամանակ պահնորդական ծառայություններ իրականացնելու համար հանձնաժողովը լիցենզիա հատկացրեց երեք՝ «Սի սիքյուռ», «Ալֆա դելտա» և «Արմ մոբիլ» մասնավոր ընկերություններին:
Նշենք, որ «Մասնավոր պահնորդական գործունեության մասին» ՀՀ օրենքն ուժի մեջ է մտել այս տարվա հուլիսի 1-ից, և այսօրվանից սկսած արդեն իսկ ոստիկանությունը համապատասխան լիցենզիաներ կտրամադրի մասնավոր պահնորդական ծառայություններ մատուցող ընկերություններին:
Այն կազմակերպությունները, որոնք օրենսդրական փոփոխություններից առաջ նման ծառայություններ էին մատուցել և դեռևս նոր լիցենզիա չեն ստացել ոստիկանությունից, ապա պարտավոր են դա անել առաջիկայում, քանի որ հակառակ դեպքում նրանք այլևս չեն կարող նշված ծառայությունները մատուցել: «Մենք դեռ էս պահին չենք գնում կտրուկ քայլերի: Մոտ մեկ ամիս թող անցնի, մենք հասկանանք՝ բեռն ինչքան է: Գուցե մինչև ամսվա վերջ բոլոր ընկերությունները հայտը ներկայացնում են»,- ասաց նիստը վարող փոխոստիկանապետ Սամվել Հովհաննիսյանը:
Նշենք, որ երբ մասնավոր պահնորդական ծառայության հարցը քննարկվում էր ԱԺ պետաիրավական հանձնաժողովում, պատգամավորների կողմից կարծիք հնչեց, որ ոստիկանական պահպանության և մասնավոր պահնորդական գործունեության միջև հստակ շահերի բախում կա: Փոխոստիկանապետը, սակայն, այդպիսի խնդիր չի տեսնում: Նրա խոսքով, այսօր քաղաքացին նման ծառայության համար պետք է դիմի այն ընկերությանը, որն իր ծառայություններն ավելի պատշաճ է մատուցում: «Ես չեմ կարծում, որ քաղաքացին գումար կդնի այնտեղ, որտեղից իր ցանկալի արդյունքը չի ստանա: Օրինակ՝ իր գործարանը պահպանության համար չի տա մի ծառայության, որն իր պահանջները չի բավարարի: Այդ առումով մենք խնդիր չենք տեսնում»,-ասաց Հովհաննիսյանը:
Լիցենզիա ստացած մասնավոր պահնորդական ընկերության աշխատակիցները հանձնում են համապատասխան քննություն, ստանում են հատուկ միջոցներ կիրառելու իրավունք: Իսկ այդ հատուկ միջոցները չորսն են՝ ռետինե մահակ, ձեռնաշղթա, տրանսպորտային միջոցը հարկադիր կանգնեցնելու միջոց և պահնորդական շունը: «Օրենքը նաև սահմանում է, որ այդ կազմակերպությունները չեն կարող իրենց վրա վերցնել ոստիկանության գործառույթ»,- նկատեց փոխոստիկանապետը: Մասնավոր պահնորդական ծառայություն իրականացնող աշխատակիցը իրավունք ունի նաև ծառայողական զենք կրել, որի համար հարկավոր է քննություն հանձնել: Սամվել Հովհաննիսյանը նշեց, սական, որ մինչ օրս որևէ մասնավոր պահնորդական ծառայություն չի դիմել ծառայողական զենքի թույլտվություն ստանալու համար և սահմանափակվում են հատուկ միջոցների շրջանակում: