Գործարարներին ստվերից հարկային դաշտ բերելու՝ Հովիկ Աբրահամյանի օպերացիայի առաջին արդյունքները օրերս հրապարակվեցին:
ՊԵԿ-ը հաշվետվություն ներկայացրեց, համաձայն որի՝ 15 տնտեսվարողների մոտ հարկերի ավելացում է նկատվել: Համաձայն ֆինանսների նախարարության ներկայացրածի՝ 2014 թվականի ընթացքում տարեկան շահութահարկի հաշվարկներով շահութաբերության ցածր ցուցանիշ հայտարարագրած 98 հարկ վճարողների կողմից ներկայացվել են ճշգրտված հաշվարկներ, որի արդյունքում հաշվարկվել է 391 միլիոն 655 հազար դրամ լրացուցիչ շահութահարկ, որից՝ 15 հարկ վճարողների մասով` 268 միլիոն 381 հազար դրամ:
Այդ 15 ընկերությունից, սակայն ոչ բոլորն են հանրությանը հայտնի և հաստատ այն ընկերությունները չէին, որ պետք է առաջնահերթ հայտնվեին ստվերից դուրս եկողների ցանկում:
Կառավարությունն ու ՊԵԿ-ը իրենց գործողություններով ուղղակի մեղադրանք առաջադրեցին այդ ընկերություններին, որ նրանք տարիներ շարունակ աշխատել են ստվերում, իսկ հիմա իրենց օպերացիայի արդյունքում դուրս են բերվում ստվերից: Եվ ինչպես օրերս մեզ հետ զրույցում ասել էր տնտեսագետ Վահագն Խաչատրյանը՝ այս ցուցակով հերթական անգամ ընդգծվեց, որ թիրախում հայտնվում են նրանք, ովքեր թիկունք և հովանավորչություն չունեն:
Մենք փորձեցինք հենց այդ 15 տնտեսվարողներից պարզել, թե ինչու էին մինչ այդ ստվերում աշխատում, և ինչպես են առհասարակ վերաբերվում կառավարության այս քայլերին, ինչը նպաստեց, որ դուրս եկան ստվերից: Բայց ինչպես պարզ դարձավ մեր զանգերից, այդ տնտեսվարողներն այնքան էլ ոգևորված չէին ՊԵԿ-ի ցուցակում հայտնվելուց և ընդհանարպես խուսափում էին պատասխանել ցուցակի հետ կապված որևէ հարցի: Ընկերութունների տնօրեններն ու աշխատակիցները հավանական և անհավանական ձևերով խուսափում էին մեր հարցերին պատասխանելուց:
Երբ զանգահարեցինք, օրինակ՝ «Բագրատուր» ընկերության աշխատակիցը, լսելով հարցը, այն փոխանցեց տնօրենին, ապա ասաց, որ տնօրենը զբաղված է: Իսկ երբ ավելի ուշ զանգահարեցինք, մեկ այլ աշխատակից ասաց, որ իրենց ընկերությունում հոսանքն անջատել են և ինքը չի կարող միացնել տնօրենի հետ:
«Էկոֆուդ» ընկերության տնօրենը հարցը լսելուց հետո բավական բորբոքվեց։ «էլ բան չունեք գրելու, սկսել եք էդ ցուցակներից, ՊԵԿ-ից գրել, ինչի՞ եք մտնում դրանց մեջ»,- ասաց: Ապա, երբ խնդրեցինք առավել հանգիստ խոսել, նա հայտարարեց, որ «ՊԵԿ-ի ցուցակում հայտնված «Էկոֆուդը» իրենք չեն»: «Դա մեր ընկերությունը չէ: Մի քանի հատ «Էկոֆուդ» կա: Մենք դրա հետ ոչ մի կապ չունենք»,- ասաց տնօրենը: Մեր ճշտող հարցին, թե հարկային մարմիններն իրենց մոտ ստուգումներ չե՞ն իրականացրել, մեր զրուցակիցը կրկին վրդովված արձագանքեց՝ ոչ:
«Ասէդլ», «Ադամիում» ընկերությունում ևս հարցը լսելուց հետո բոլոր պատասխանատուները զբաղված դարձան:
15 տնտեսարողների ցանկում հայտնված որոշ ընկերություններ, ընկերություններից կոնտակտներ առհասարակ գտնել չհաջողվեց: Ձկնամթերքի ներկրմամբ զբաղվող հայ-լյուքսեմբուրգյան համատեղ «Դիմիտրի» ձեռնարկությունը ևս անհասանելի էր: Իրենց իսկ կայքում գրանցված կոնտակտները, պարզվեց, իրենց չէին պատկանում: Դե, իսկ «Սմբո» ՍՊԸ-ն ու ևս մի երկուսը բացարձակապես անհայտ էին: