Մոսկվայում ձերբակալված հայազգի մեծահարուստ, բարերար Լևոն Հայրապետյանի եղբայրը, որը Ղարաբաղում նրա ծրագրերն է ղեկավարում, հայտարարել է, որ եղբոր հանդեպ ռուսական լրատվամիջոցների մեղադրական տեղեկությունները սուտ են, և նրա հանդեպ քաղաքական հաշվեհարդար են տեսնում: Թե որոնք են հաշվեհարդարի մանրամասները, մոտիվները՝ Լևոն Հայրապետյանի եղբայրը չի նշել, սակայն այն, որ Ռուսաստանում նման խոշոր գործերը հենց այնպես, զուտ արդարության և արդարադատության իրավական կարիքներից ելնելով չէ, որ տեղի են ունենում, ակնհայտ է:
Հայտնի է դարձել, որ Հայրապետյանին մեղադրում կամ կասկածում են «Բաշնևթ» ընկերության և ռուսական «Սիստեմա» հոլդինգի միջև առևտրային գործարքի մեջ: Ըստ կասկածների՝ 2008 թվականին Հայրապետյանը «Բաշնևթի» վաճառքից (ընկերության հսկիչ փաթեթը ձեռք է բերել «Սիստեման») ստացել է անօրինական շահույթ և փորձել է լեգալացնել ապօրինի միջոցներ:
Հետաքրքրական մանրամասն կարող է լինել այն, որ «Սիստեման» այն ընկերությունն է, որտեղ 2008 թվականին պաշտոնը թողնելուց հետո տնօրենների խորհրդում աշխատանքի է տեղավորվել Հայաստանի նախկին նախագահ Ռոբերտ Քոչարյանը: Սա, իհարկե, իմիջիայլոց, քանի որ «Սիստեման» ընդհանրապես Լևոն Հայրապետյանի գործում, այսպես ասած, դերակատար չէ, ուղղակի հետաքրքիր է, որ գործարքը, որի համար կամ որի հիմքով, կամ առիթով մեղադրանք է ներկայացվել Լևոն Հայրապետյանի դեմ, եղել է հենց «Սիստեմա»-ի հետ:
Իհարկե, մեղմ ասած՝ անհավանական է թվում, որ Ռուսաստանում նման խոշոր գործ կարող է հարուցվել, այսպես ասած, զուտ հայկական մոտիվներով: Շատ ավելի հավանական է, որ հայազգի մեծահարուստը ուղղակի, այսպես ասած, հարվածի տակ է հայտնվել ներռուսաստանյան շատ ավելի խոշոր խաղերի արդյունքում: Սակայն այսպես, թե այնպես՝ այն, որ այս խաղերում կան հայկական դերակատարներ, թեկուզ ընդամենը հարվածի տակ հայտնված և ուրիշ խաղերի զոհ դարձող, մեծ է դարձնում հավանականությունը, որ գործի արձագանքները կարող են նաև հասնել մինչև Հայաստան:
Խոսքը, բնականաբար, քաղաքական, ոչ թե իրավական արձագանքների մասին է: Այսինքն՝ իրավական կարող են լինել այդ արձագանքները այնքանով, ինչքանով որ կունենան քաղաքական կարիք: Այսինքն՝ եթե ռուսական այդ խաղում որևէ մեկը փորձի այլ խնդիրներ էլ լուծել, մասնավորապես՝ Հայաստանի հետ կապված, ապա Հայրապետյանի դեմ հարուցված գործը չեն զլանա տարածել նաև հայկական ուղղության վրա:
Միգուցե սա է նաև պատճառը, որ Հայրապետյանի ձերբակալության մասով ակտիվ է արձագանքների մեջ միայն հայաստանյան մամուլը, իսկ քաղաքական կամ տնտեսական քիչ թե շատ դերակատարում ունեցող շրջանակները լուռ են, հատկապես՝ իշխանական և մերձիշխանական շրջանակները:
Շատ հավանական է, որ այդ շրջանակներում այսօր ընթանում է, այսպես ասած, «կանալները ճշտելու» և իրավիճակը հասկանալու գործընթաց՝ վտանգները և ռիսկերը գնահատելու և դրանց չեզոքացման ուղղությամբ Ռուսաստանի հետ աշխատելու համար:
Չի բացառվում նաև, որ Լևոն Հայրապետյանն ինքը դարձել է հայ-ռուսական որևէ խաղի զոհ, ինչի մասին էլ ակնարկում է գուցե թե նրա եղբայրը՝ խոսելով քաղաքական հետապնդման մասին: