Վրացական apsny.ge լրատվական կայքի հաղորդմամբ, այսօր վրացական խորհրդարանում ելույթ ունեցող Վրաստանի վարչապետ Նիկա Գիլաուրին հայտարարել է, որ ԵՄ-ը Վրաստանը դիտարկում է որպես էլեկտրաէներգիայի պահեստային մատակարար.
«Ես բանակցել եմ էներգետիկ հարցերով եվրոպական կոմիսար Գյունտեր Օտինգերի հետ, որն էլ ուղղակիորեն ինձ հայտնել է այդ մասին: ԵՄ-ն որպես էլեկտրաէներգիայի պահեստային մատակարարներ է դիտարկում հետևյալ երկրներին. Եվրոպայի հարավում` Իսպանիային, կենտրոնում` Շվեյցարիային, իսկ արևելքում` Վրաստանին:
Վրաստանը մաքուր էլեկտրաէներգիայի արտահանման գծով բավականին արագ զարգացող երկիր է: Վրաստանն արդեն իսկ սեփական էլեկտրաէներգիա է արտահանում Ադրբեջան, Թուրքիա և Ռուսաստան: Այդ էլեկտրաէներգիան արտադրվում է մեր հիդրոէլեկտրակայաններում (հէկ): Ներկայումս Վրաստանում ընթանում է 5 հէկերի կառուցման գործընթացը, իսկ մինչև 2013 թվականը կկառուցվեն ևս 18 հէկեր:
Մենք նաև զարգացնում ենք էլեկտրաէներգիայի արտահանման գործընթացը` Ադրբեջանի ու Թուրքիայի հետ էլեկտրահաղորդակցության նոր գծեր կառուցելով: Դա կարող է հանգեցնել նաև գործազրկության նվազմանը, քանի որ այդ աշխատանքներում ներգրավվելու են տեղի բնակիչները»:
