Թուրքական haber365.com լրատվական կայքի հաղորդմամբ, թուրքական խորհրդարանում ներկայացված քրդական միակ լեգալ «Խաղաղություն և ժողովրդավարություն» կուսակցության (ԽԺԿ) նախագահ Սելահաթթին Դեմիրթաշը Շանլըուրֆա քաղաքում, Նովրուզի կապակցությամբ շնորհավորելով քուրդ ժողովրդին, անդրադարձել է քրդական խնդրի լուծմանը.
«Անշուշտ, մենք այժմ կանգնած ենք դժվարությունների առջև: Յուրաքանչյուր օր ձերբակալվում են մեր կուսակցական ընկերները, այդ թվում՝ նաև մեր կուսակցության նահանգային ղեկավարներն ու քաղաքապետերը:
Իշխող «Արդարություն և զարգացում» կուսակցությունը (ԱԶԿ) մի կողմից բանակցություններ է վարում Օջալանի հետ, իսկ մյուս կողմից՝ ռազմական գործողություններ ձեռնարկում քրդերի դեմ:
Քրդական հարցը Թուրքիայում չպետք է թողնվի 2012 թվականին: Մենք այստեղից ուղերձ ենք հղում ԱԶԿ-ին: Օջալանին ազատ արձակելու խնդիրը պետք է մշտապես գտնվի թուրքական կառավարության օրակարգում»:
Հիշեցնենք, որ թուրքական իշխանությունները ցայժմ պաշտոնապես չեն հաստատել, որ հունիսի 12-ին կայանալիք խորհրդարանական ընտրություններից առաջ վարչապետ Էրդողանը զինադադարի հաստատման ու պահպանման հարցում բանակցություններ է վարել Մարմարա ծովի Իմրալը կղզում ցմահ բանտարկություն կրող քուրդ առաջնորդ Աբդուլլահ Օջալանի հետ:
Վերջինս այդ կապակցությամբ ոչ վաղ անցյալում նշել էր. «Արդեն 8 տարի է, ինչ ես շանս եմ տալիս Էրդողանի կուսակցությանը: Սա արդեն 5-րդ ընտրությունն է: Ամեն անգամ գալիս են ինձ մոտ և ասում. «Թող այս ընտրություններն էլ անցնեն» կամ «Սպասիր հաջորդ ընտրություններին»: Այժմ ինձ դարձյալ ասում են. «Սպասիր հաջորդ ընտրություններին»: Սա Էրդողանի վերջին հնարավորությունն է»:
