Մուրացանի հոսպիտալում գտնվող 37-ամյա Կարինե Դավթյանը, որը հուլիսի 11-ի երեկոյան Սոթքի մոտ գլխից հրազենային վիրավորում է ստացել ադրբեջանցի դիվերսանտի կրակոցից, սկսել է խոսել: Այս մասին «Առաջին լրատվական»-ին հայտնի դարձավ մեր աղբյուրներից:
Առաջինը Կարինեն ամուսնուն հարցրել է՝ ո՞ղջ է, թե՞ մահացել է դեպքի օրը մեքենան վարող ամուսնու ընկերը՝ Սարգիս Աբրահամյանը: Սա նշանակում է, որ Կարինեն հիշում է կատարվածը: Բժիշկները, սակայն, առայժմ արգելել են Կարինեին խոսել: Նրան այժմ հանգիստ է պետք վերականգնման համար:
Հիշեցնենք, որ երկու երեխաների մայր Կարինեն հրազենային վիրավորում է ստացել գլխից. գնդակը, մեր տեղեկություններով, ականջի հետևի մասից մտել է, ճակատից դուրս է եկել: Վնասվել է Կարինեի ձախ աչքի հետնամասը. ձախ աչքն այտուցված է և չի թարթում: Կարինեի վիճակը կայուն ծանր է, կյանքին վտանգ չի սպառնում:
Կարինեն երկու անչափահաս երեխա ունի, ապրում է Երևանում: Նա դեպքի օրը մեկնելիս է եղել Քարվաճառ՝ զինծառայող ամուսնուն և ավելի վաղ ամուսնու մոտ գնացած տղային տեսակցելու:
Կարինեի ամուսնու ընկերը՝ Սարգիս Աբրահամյանը, որը դիվերսանտի կրակոցից մահացել է, մեքենայով նրան Վարդենիսից Քարվաճառ էր տանում: Մեր տեղեկություններով` երջանիկ պատահականությամբ նրանց հետ չի եղել Կարինեի աղջիկը, որը, նախնական ծրագրի համաձայն, պետք է մեկներ մոր հետ, սակայն գործեր է ունեցել ու չի միացել նրան:
Հիշեցնենք, որ վիրավորված Կարինեին ուղղաթիռով տեղափոխել էին Երևան այն բանից հետո, երբ Հայաստան ներթափանցած ադրբեջանցի դիվերսանտին վնասազերծելու փոխհրաձգության ժամանակ հուլիսի 11-ին նա ծանր վիրավորվել էր: Փոխհրաձգության ժամանակ զոհվել է հայ սպա, երեք երեխաների հայր`1972 թվականին ծնված մայոր Սարգիս Աբրահամյանը:
