«Ազատության ծոմը բոլորում է իր մեկ շաբաթը և մտնում 8-րդ օրվա մեջ: Այս մեկ շաբաթվա ընթացքում Ազատության հրապարակ են եկել մոտավորապես 15 հազար քաղաքացիներ՝ արտահայտելու իրենց զորակցությունը, աջակցությունը` երբեմն խրատով, երբեմն՝ դիպուկ ռեպլիկներով, նշելով, թե ես այստեղ ուրիշի փոխարեն եմ նստել հացադուլի, և իմ տեղում պետք է նստած լինեին իշխանությունները»,- այսօր Ազատության հրապարակում լրագրողների հետ հանդիպման ժամանակ ասաց «Ժառանգություն» կուսակցությունից պատգամավոր Րաֆֆի Հովհաննիսյանը:
Նա նշեց, որ ինքը ներողամտությամբ է մոտենում այն բոլոր հրապարակումներին, մեկնաբանություններին, որոնք եղել են այս մեկ շաբաթվա ընթացքում:
Րաֆֆի Հովհաննիսյանի խոսքերով, «Ժառանգությունը» շատ հստակորեն դրել է իր քաղաքական պահանջը. «Երևում է, որ մարդիկ չեն ընթերցել,- չեմ էլ սպասում,- մարտի 15-ին քաղաքացիական մեր հավաքի ժամանակ իմ արտասանած ծրագրային խոսքը, որը հիմնաքարն է այս ազատության ծոմի»:
Րաֆֆի Հովհաննիսյանը նշեց,որ իր ծրագրային խոսքի մեջ ամբողջությամբ նշված են իրենց ակնկալիքները և ապագային միտված սպասելիքները:
«Ես մարտի 15-ին մտա Ազատության հրապարակ՝ որպես Հայաստանի հպարտ քաղաքացի, իմ սահմանադրական իրավունքը իրականացնելու համար և ոչ թե քրիստոնեական որևէ ծիսակատարության կամ Մեծ պահքի շրջանակներում»,- ասաց Րաֆֆի Հովհաննիսյանը: