«Պետք չէր 1,5 տարի արձագանքել ռուս-ադրբեջանական գործարքին: Ռազմավարական գործընկերությունը միայն թղթով չի ավարտվում և միայն գույք պարտքի դիմաց վերցնելով չէ»,- «Առաջին լրատվական»-ի հետ զրույցում նման տեսակետ հայտնեց ՀՀՇ գործադիր քարտուղար Կարեն Կարապետյանը՝ անդրադառնալով Սերժ Սարգսյանի՝ արգենտինական Clarin թերթին տված հարցազրույցին:
Նրա խոսքերով՝ նորմալ է այն, որ ցանկացած պետություն առաջնորդվում է իր շահերով, բայց Հայաստանը նույնպես պետք է ունենա իր շահը․ «Անհասկանալի է՝ Հայաստանն ունի՞ առհասարակ արտաքին քաղաքականություն, թե ոչ: Պետք չէր գնալ Արգենտինա ու այնտեղ բարձրաձայնել նման բանի մասին, պետք էր անել ուղիղ ու ի սկզբանե»,- նկատեց մեր զրուցակիցը՝ հավելելով, որ եթե այդ հայտարարությունը նույնիսկ մեսիջ է Ռուսաստանին, ապա շատ թույլ է:
Կարեն Կարապետյանի դիտարկմամբ՝ Հայաստանն ինքնուրույն չի որոշում անդամագրվել ԵՏՄ-ը, թե ոչ․ «Մեր փոխարեն որոշում են, մեզ ապտակում են, և մենք այդ մասին լռում ենք: Մենք պետք է այնքան կամք դրսևորենք, որ մեզ հետ հաշվի նստեն և ոչ անընդհատ փաստի առաջ կանգնեցնեն»:
Նրա դիտարկմամբ՝ եթե մենք ինքներս որոշեինք անդամագրվել այդ կառույցին, որևէ պետություն իրեն թույլ չէր տա մեզ հետ նման կերպ վարվել․ «Գուցե ամեն դեպքում շնորհակալություն հայտնենք Ղազախստանից ու Բելառուսից, որ իրենց ջանքերով նաև այդ միության անդամագրումը աստիճանաբար դառնում է պակաս իրատեսական»:
Հարցազրույցն ամբողջությամբ՝ մեր տեսանյութում։
