Հայկական սոցիոլոգիական ասոցիացիայի տնօրեն Գևորգ Պողոսյանը կարծում է, որ ժողովրդի մեջ փոփոխությունների սպասումներ վաղուց կան: Ընդ որում, ըստ նրա՝ խոսքը սոցիալ-տնտեսական իրավիճակին վերաբերող փոփոխությունների մասին է:
Սակայն Պողոսյանը համոզված է, որ ժողովուրդը չի հետևի արաբական աշխարհում տեղի ունեցող հեղափոխություններին: Նրա կարծիքով, դա ունի երկու պատճառ. «Առաջին պատճառն այն է, որ մեր հասարակությունը ֆիզիկապես թուլացել է։ Երկրորդ պատճառը հարևան երկրների սպառնալիքներն են, որոնք մեր ժողովրդին միշտ սթափ վիճակում են պահում։
Չեմ կարող ասել, որ սոցիալական ընդվզումներ չեն լինի, վիճակը շարունակում է լարված մնալ»,- այսօրվա ասուլիսում ասաց պարոն Պողոսյանը:
Վերջինս նաև նշեց, որ վերջին շրջանում Սերժ Սարգսյանի քայլերը, ընդդիմության հանրահավաքները, ինչպես նաև «Ժառանգություն» կուսակցության նախագահ Րաֆֆի Հովհաննիսյանի հացադուլը արաբական աշխարհում և Մերձավոր Արևելքում կատարվող իրադարձությունների ազդեցությունն են։