ԲՀԿ խմբակցության պատգամավոր Նաիրա Զոհրաբյանը, անդրադառնալով Ընտրական օրենսգրքի փոփոխություններին, ԱԺ քառօրյա նստաշրջանում հայտարարեց, որ ոչ միայն պետք է, այլև անհրաժեշտ է փոփոխել Ընտրական օրենսգիրքը.
«Ցանկացած ընտրություն բերում է սողանքներ, որոնք անհրաժեշտ է շտկել օրենսդրությամբ, ասել, թե այս փոփոխություններից հետո ունենալու ենք իդեալական ընտրական օրենք, և առաջիկա համապետական ընտրությունները լինելու են ամենաիդեալականը՝ իհարկե, ես նման պատասխանատվություն չէի ստանձնի,միայն կասեի,որ եթե առաջիկա ընտրությունները բերեն նման սողանքներ,ապա ես չեմ բացառում, որ օրենսդրորեն կրկին բարելավվի Ընտրական օրենսգիրքը»,- ասաց Նաիրա Զոհրաբյանը:
Հովիկ Աբրահամյանը ևս մեկ անգամ ներկայացրեց իր խմբակցության առաջարկած Ընտրական օրենսգրքի դրույթները, որից հետո Դավիթ Հարությունյանը առաջարկեց քվեարկել:
Ներկա պահին Ընտրական օրենսգրքի փոփոխությունների իրենց տարբերակ է ներկայացնում ԱԺ ՀՅԴ խմբակցության պատգամավոր Արծվիկ Մինասյանը, որի դիտարկմամբ, իրենց առաջարկած Ընտրական օրենսգրքի ընդունման դեպքում հնարավորություն կընձեռվի ընտրությունների միջոցով իշխանափոխության հասնելու:
