Օրեր առաջ Արգենտինա կատարած այցի շրջանակներում Հայաստանի նախագահ Սերժ Սարգսյանին չընդունեց երկրի նախագահ Քրիստինա Ֆերնանդես դե Քիրշները:
Սերժ Սարգսյանին, ՀՀ սփյուռքի և մշակույթի նախարարներ Հրանուշ Հակոբյանին և Հասմիկ Պողոսյանին ընդունեցին Արգենտինայի այլ բարձրաստիճան պաշտոնյաներ, իսկ նախագահի նման վարվելակերպը պատճառաբանվեց վերջինիս հիվանդ լինելու հանգամանքով:
Ուշագրավ է, որ այս իրադարձությունից ընդամենը օրեր անց Արգենտինայի նախագահ Քրիստինա Ֆերնանդես դե Քիրշները ջերմ ընդունելության արժանացրեց մեր ռազմավարական գործընկեր Ռուսաստանի նախագահ Վլադիմիր Պուտինին, իսկ արդեն երեկ մերժեց Բրազիլիայի նախագահի հրավերը՝ այնտեղ դիտելու Ֆուտբոլի աշխարհի առաջնության եզրափակիչ հանդիպումը՝ կրկին պատճառաբանելով վատառողջ լինելու հանգամանքը:
Պատահականությո՞ւն է այս ամենը, թե՞ Վլադիմիր Պուտինի այցը շատ ավելի կարևոր էր, քան մեր նախագահինը, և ինչպես մամուլում այս օրերին շրջանառվում է՝ Արգենտինայի նախագահը միտումնավոր չի ընդունել Սարգսյանին, փորձեցինք պարզել Արգենտինայում Հայ առաքելական եկեղեցու առաջնորդարանից և Արգենտինայում Հայաստանի դեսպանատանից:
«Առաջին լրատվական»-ը Հայ Առաքելական եկեղեցու Արգենտինայի առաջնորդարանից տեղեկացավ, որ Արգենտինայի նախագահը ֆարինգիտ է ունեցել, և բժիշկները մի քանի օր շարունակ հակացուցել են դուրս գալ և հանդիպումներ ունենալ: Նա նույնիսկ չի կարողացել հուլիսի 9-ին մասնակցել Արգենտինայի անկախության օրվան նվիրված միջոցառումներին: Երբ այնտեղ է ժամանել ՌԴ նախագահ Վլադիմիր Պուտինը, նախագահն արդեն կազդուրված է եղել, իսկ արդեն Բրազիլիա մեկնելու հրավեր ստանալիս վերջինիս առողջական վիճակը կրկին վատացել է:
Արգենտինայում ՀՀ դեսպանատան աշխատակցուհին մեզ հետ զրույցում նշեց, որ իրավասու չէ պատասխանելու այդ հարցերին, և փոխանցեց այն, ինչ գրված է Արգենտինայի նախագահի պաշտոնական էջում, որ վերջինս կոկորդային անգինայի և ֆարինգիտի պատճառով չի կարողացել ընդունել ՀՀ նախագահին, մինչև Վ․ Պուտինի այցը չեղյալ են համարվել Լատինական Ամերիկայի մի շարք երկրների նախագահների այցերը Արգենտինա՝ նախագահի վատառողջության պատճառով։
