ԱՄՆ նախագահ Բարաք Օբաման հուլիսի 10-ին Հայաստանում ԱՄՆ դեսպանի պաշտոնում առաջադրել է Ռիչարդ Միլսի թեկնածությունը: Միլսը Բեյրութում ԱՄՆ դեսպանի տեղակալն էր:
Լիբանանի «Ազդակ» թերթի գլխավոր խմբագիր Շահան Կանդահարյանն «Առաջին լրատվական»-ի հետ զրույցում նշեց, թե Միլսը բավական փորձ կուտակած մարդ է, ով աշխատել է ԱՄՆ պետքարտուղարությունում, բավական ծանոթ է կովկասյան հարցերին, ենթադրաբար նաև՝ հակամարտության խնդիրներին, վերջին շրջանում էլ տեղափոխվել էր Բեյրութ:
«Բեյրութում նա զբաղվել է տարածաշրջանային խնդիրներով. գիտեք, Բեյրութը հայտնվել էր տարածաշրջանի բավական թեժ քաղաքական իրավիճակում: Վերջին շրջանում և սիրիական պատերազմի ազդեցությանը, և նաև այնտեղ զարգացող ծայրահեղ մուսուլմանական շրջանակների զարգացումներին, ստեղծված իրադրություններին՝ այս ամենին նա ծանոթ է: Այդ առումով, կարծում եմ, և կովկասյան տարածաշրջանի, և Միջին Արևելքի իրադարձություններին ծանոթ լինելը երևի իր նշանակման համար իբրև հիմնավորում, իբրև մեկնակետ է ծառայել: Կարծում եմ, որ այնտեղ նկատի է առնվել արձանագրված իրադարձություններին ծանոթ լինելը, այդ առումով փորձ ամբարելը»,- ասաց նա:
Կանդահարյանն ընդգծեց, որ Միլսը ծառայել է փոխդեսպանի կարգավիճակով, մինչդեռ ընդհանրապես հանդիպումներին, բանակցություններին, հայտարարություններին դեսպանն է ավելի հրապարակային տեսքով ելույթներ ունենում, բայց, բնականաբար, դիվանագիտական անձնակազմը և հատկապես փոխդեսպանն անմիջականորեն առնչված կլինեն այդ բոլոր իրադարձություններին: Այդուհանդերձ, փոխդեսպանն ընդհանրապես այդ աշխատանքներում այնքան էլ չի երևում:
Միլսի աշխատանքից կոնկրետ ակնկալիքներ, ըստ Կանդահարյանի, պետք չէ ունենալ, քանի որ նա պիտի իրականացնի այն, ինչ պետքարտուղարությունն է որոշում:
«Այսինքն՝ ես չեմ կարծում, որ անձի փոփոխությամբ կտրուկ շրջադարձեր կլինեն, պարզապես այստեղ պիտի նկատի ունենանք այն հանգամանքը, որ ինքն արդեն աշխատել է այդ բաժանմունքում և ծանոթ է հայաստանյան իրականությանը՝ քաղաքական, արտաքին քաղաքական, Հայաստան-ԱՄՆ միջպետական հարաբերություններին, նաև՝ տարածաշրջանի, որովհետև զբաղվել է նաև Ադրբեջանով, ուստի պետք է որոշակի չափով իրազեկված լինի նաև հակամարտության մասին, իսկ քանի որ այստեղ էլ է աշխատել, բնականաբար՝ նաև որոշ չափով փորձ է հավաքել, տեղյակ է Միջին Արևելքում տեղի ունեցող զարգացումներին»,- ասաց նա: