Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ սկսվում է Արսեն Քյաբաբչյանի գործի դատական քննությունը:
1998 թվականի փետրվարին է ծնվել անչափահաս ամբաստանյալը:
ՀՀ քրեական օրենսգրքի 104 հոդվածի 1-ին մասով առաջադրված մեղադրանքի համաձայն՝ անչափահաս Արսենը, ում հասցեի դիմաց նշված է՝ «մշտական բնակության վայր չունի», 2014 թվականի հունվարի 22-ին, ժամը 11-ն անց 30-ի սահմաններում իր ծանոթ Անդրանիկի տան հյուրասենյակում անձնական հարցերի շուրջ վիճաբանել է տանտիրուհի Ամալյա Ս.-ի հետ: Վիճաբանության ընթացքում Արսեն Քյաբաբչյանը սպանության դիտավորությամբ ձեռքով հարվածել է Ամալյայի դեմքին, նրան գցել գետնին, ոտքերով հարվածել կնոջ գլխին, դեմքին, պարանոցին, կրծքավանդակին, որից հետո ձեռքերով սեղմել է ընկածի պարանոցը: Պատճառել է քթի ոսկրերի փակ կոտրվածքներ, լեզվի ծայրի սալջարդ վերք, ուղեղի՝ կարծր ու փափուկ թաղանթներում, ուղեղիկի ու գլխուղեղի հիմային մակերեսների վրա անցումով՝ կետավոր արյունազեղումներ և բազմաթիվ այլ վնասվածքներ:
Տուժողը մեխանիկական շնչահեղձությունից և գլխուղեղի կենսականորեն կարևոր ֆունկցիաների սուր խանգարումից, արտաքին շնչական անցքերի փակման ու պարանոցի օրգանները ձեռքերով սեղմելու-խեղդելու, գանգուղեղային փակ բութ վնասվածք ստանալու պատճառով մահացել է:
Արսեն Քյաբաբչյանը դատարանում հայտնեց, որ գրանցում չունի: Ապրել է ծնողների հետ: Ասաց, որ նորմալ կենսակերպով է ապրել, ծնողներից դժգոհ չէ:
Տղայի պահվածքը բավական անկաշկանդ էր, իսկ ձեռնափի դրսային մասում աչքի էին ընկնում դաջվածքները: Բնութագրական տվյալ է այն, որ անչափահասն ապրել է ոչ թե ընտանիքի հետ, այլ վարձով՝ ընկերոջ հետ, ինչպես նաև այն, որ նա գրանցում չի ունեցել:
Պաշտպանական կողմն ասաց, որ այդ հարցի վերաբերյալ իր ցուցմունքում պարզաբանում կկատարի ամբաստանյալի մայրը:
Արսենը հայտնեց, թե միջնակարգ կրթություն ունի, բայց պաշտպանի՝ փաստաբան Մարինե Թովմասյանի հարցին պատասխանեց, որ իններորդ դասարանն է ավարտել:
Տղայի մայրը նրա օրինական ներկայացուցիչն է:
Նախաքննության ժամանակ ներգրավվել է տուժողի իրավահաջորդ՝ տուժողի քրոջ թոռը, բայց քանի որ տուժողի իրավահաջորդ կարող է լինել միայն տուժողի մերձավոր ազգականը, այդ պատճառով դատարանը նրան ներգրավել է որպես վկա:
Մեղադրական եզրակացության հրապարակումից հետո Արսեն Քյաբաբչյանն իրեն մեղավոր չճանաչեց:
Ապացույցների հետազոտման հաջորդականություն սահմանելուց առաջ, պաշտպան Մարինե Թովմասյանի միջամտությունից հետո Արսենը հայտնեց, որ մասնակի է մեղավոր ճանաչում իրեն. «Վնաս հասցրել եմ, բայց ոչ այն աստիճանի, որ մահ լիներ»:
Դատական քննությունը սկսվեց վկաների հարցաքննությունից:
Վկա Անդրանիկը ծնողներ չունի: Մոր մահից հետո նրան պահել-մեծացրել է տուժողը, ում հետ նա ազգակցական կապ չունի:
Վկան ապրել է տուժողի տանը: Այդ տանը նաև «տնվորներ» են եղել:
Անդրանիկը հայտնեց, որ սպանության օրը աշխատանքից հետո գնացել է ծնունդ: Երեկոյան ժամը տասնմեկին մոտ իրեն զանգել են տնվորները, ասել, որ դուռը փակ է, բանալին դռան վրա չէ, իրենք չեն կարողանում գնալ զուգարան, որն այդ տանը ընդհանուր էր:
Անդրանիկը շտապ տուն է եկել, տեսել, որ իրոք բանալին չկա, Ամալյան էլ չի արձագանքել: Դուռը ջարդել են, ներս է մտել, տեսել է տատիկը գետնին ընկած է, արդեն՝ մահացած:
Վկան մոտ չի գնացել, վնասվածքները չի տեսել՝ վախեցել է, տնվորներն էլ ասել են՝ չմոտենաս:
Հարևանները ոստիկանություն են զանգել:
Վկան հայտնեց, որ Արսենը վարձով է ապրել այդ տանը դեպքից կես տարի առաջ: Դեպքից առաջ՝ երեք օր իրար վրա, եկել է տատիկի տուն: Ընկերը վարձով տուն էր ուզում, բայց Ամալյան ասել է, որ վարձով տուն չունի: Արսենն ընկերոջ հետ է եկել: Ամալյայի տանն էլ հաց է կերել:
Ըստ վկայի՝ տան բանալին միշտ դռան վրա է եղել: Մինչև ժամը տասնմեկը ինքը բակ չի մտել: Եկել, տեսել է՝ բանալին տեղում չէ, դուռն էլ փակ է:
Տատիկը ընկած էր սեղանի մոտ,« յուբկեն բարձրացրած էր»: Վկան նրան տեսնելով՝ գոռացել է՝ Ամալյա տատիկ, Ամալյա տատիկ: Տուժողը ձայն չի հանել, վկան գոռացել է, տնվորները, որ դրսում էին, ներս են եկել:
Դրանից հետո վկան Արսենին չի տեսել, նրա հետ չի խոսել: Ոստիկանությունում է իմացել նույն օրը, որ Արսենն է տատիկին սպանել:
«Ես իրա անունը Արմեն գիտեի»,- ասաց վկան Արսենի մասին:
Վկա Անդրանիկն աշխատել է ռեստորանում՝ որպես մատուցող:
Երբ Արսենը վարձով ապրել է տատիկի տանը, Անդրանիկը շփվել է նրա հետ, ըստ վկայի՝ Արսենը տատիկի հետ իր ներկայությամբ չի վիճել: Արսենին իրենք լավ են վերաբերվել, օրինակ՝ վկան իր երկու զույգ ապոգներից մի զույգը նրան է տվել՝ տեսնելով, որ Արսենը ձմռանը կոշիկներով է:
Չի հարցրել նրան՝ ծնողներ ունի՞, թե՞ չէ: Տունը վարձով տվել էին ուրիշ տղայի, Արսենը նրա ընկերն էր, այդ տղան Արսենից մեծ էր: Վկան չգիտի՝ Արսենն ու ընկերը ինչով են զբաղվել:
Պաշտպանն ասաց, որ հետագայում կարող է կարիք լինել վկային նորից հարցաքննելու:
Վկա Գուրգենը տուժողի քրոջ թոռն է:
Հունվարի 22-ին զանգել են, ասել սպանության մասին:
Չգիտի՝ տուժողը թշնամի ունեցե՞լ է, թե՞ ոչ, առանձնապես կապված չի եղել տուժողի հետ:
Գործին ծանոթանալով է իմացել մանրամասները: Իրական տուժողի իրավահաջորդը այս վկայի տատիկը պիտի լիներ՝ տուժողի քույրը:
Տատիկի անունից վկան խնդրեց նիստը հետաձգել՝ մինչև իր տատը՝ տուժողի իրական իրավահաջորդը, ով տարեց է և անձամբ չի կարող ներկայանալ, ուղարկի իր ներկայացուցչին:
Տուժող Ամալյայի առողջական վիճակը, ըստ վկայի, շատ լավ էր: Ընթացքում տեղեկացել է, որ Արսեն Քյաբաբչյանը վարձով է ապրել տուժողի տանը, հետո եկել է, նորից վարձով տուն է ուզել: Տուժողը չի տվել:
Իր անձնական կարծիքով՝ մի հոգի չի եղել տուժողին ծեծողը: Այդպես ենթադրում է՝ դատելով տուժողի ստացած վնասվածքներից: Տուժողը կիսամերկ է եղել, դեմքը, մարմինը՝ վերքոտ:
Վկան տասմեկն անց կես է եկել դեպքի վայր: Անդրանիկին տեսել է դրսում: Նա շոկային վիճակում էր:
Որ Անդրանիկը ինտերնետային ակումբներ է հաճախել՝ վկան տեղյակ չէ: Որ դեպքի օրը նա Քյաբաբչյանի հետ եղել է ինտերնետ ակումբում՝ նույնպես տեղյակ չէ: Այսպես պատասխանեց վկան պաշտպանի հարցերին:
Ամբաստանյալի շահերի պաշտպանը հայտարարեց, որ տուժողի բարեկամուհիներից մեկը հովհարը քսում է պարանոցին ու ամբաստանյալին սպանելու սպառնալիք է տալիս լուռումունջ:
Նախագահողն ասաց, որ դատարանը որևէ խախտում չի արձանագրել, «եթե որևէ մեկը հովհարով իրեն հով է անում կամ պարանոցի շրջանում գործողություն է կատարում, դեռ չի նշանակում, որ սպանության սպառնալիք է տալիս»:
Այնուամենայնիվ, նախագահողը նշեց, որ սպանության սպառնալիք լինելու դեպքում պաշտպանական կողմը կարող է անհապաղ դիմել ոստիկանություն:
Նիստը հետաձգվեց, որովհետև մյուս վկաները չէին ներկայացել: Հաջորդ նիստը տեղի կունենա հուլիսի 24-ին: Դատարան պետք է ներկայանա ու դատական քննությանը ներգրավվի տուժողի իրավահաջորդի ներկայացուցիչը:
