Ֆինանսների նախարարությունը երեկ հրապարակեց 15 տնտեսվարողների մոտ իրականացված ստուգումների հաշվետվությունը՝ ցույց տալով, որ այդ ընկերությունների մոտ հարկերի ավելացում է նկատվել:
Հիշեցնենք, որ Հովիկ Աբրահամյանը խոստացել էր, որ հուլիսի 1-ից սկսած ֆինանսների նախարարությունը 10 օրը մեկ պետք է հաշվետվություն ներկայացնի, որը պետք է փաստի, որ տնտեսվարողների մոտ հարկերն ավելացվել են, և նրանք այլևս սկսել են գործել հավասար մրցակցային, ստվերից դուրս դաշտում:
Համաձայն ֆինանսների նախարարության ներկայացրածի՝ 2014 թվականի ընթացքում տարեկան շահութահարկի հաշվարկներով շահութաբերության ցածր ցուցանիշ հայտարարագրած 98 հարկ վճարողների կողմից ներկայացվել են ճշգրտված հաշվարկներ, որի արդյունքում հաշվարկվել է 391,655.2 հազար դրամ լրացուցիչ շահութահարկ, որից՝ 15 հարկ վճարողների մասով` 268381.3 հազար դրամ:
Բայց երբ ուսումնասիրում ենք այս 15 ընկերությունները, ապա ակնհայտ է դառնում, որ դրանց մեծ մասը հանրությանն անհայտ, ընդամենը 4-5-6 միլիոն շահույթ ունեցող ընկերություններ են: Մինչդեռ բոլորի համար շատ պարզ է, որ այսօր Հայաստանում ստվերում գործում և հարկերից խուսափում են ոչ թե «փոքրերը», այլ խոշոր ընկերությունները, որոնց մի մասն էլ պատկանում է հենց իշխանական վերնախավի ներկայացուցիչներին:
Տնտեսագետ, Հայ ազգային կոնգրեսի անդամ Վահագն Խաչատրյանի խոսքով՝ ֆինանսների նախարարության հրապարակած ցուցակը վառ ապացույցն է նրա, որ գործարարներին ստվերից դուրս բերելու կառավարության ձեռնարկած օպերացիան ընդամենը ձևական, ցուցադրական քայլ է, իմիտացիա: «Ոչ մի նորություն չկա այդ ցուցակներում: Դա սովորական հարկային մարմինների ամենօրյա աշխատանքն է: Բայց մեկ է, ոչ մի արդյունքի էլ չեն հասնի և ի սկզբանե էլ պարզ էր, որ խաղի կանոններ չի փոխվել և չի էլ կարող փոխվել»,- «Առաջին լրատվական»-ի հետ զրույցում ասաց Վահագն Խաչատրյանը՝ հավելելով, որ խնդիրը համակարգային է: «Սա համակարգային խնդիր է և ցանկություն էլ չկա որևէ բան փոխելու: Դրանք ընդամենը խոսքեր են, հայտարարություններ են, որոնք ոչ մի բան չեն նշանակում: Նմանատիպ բաներ շատ ենք տեսել: Ֆինանսների նախարարության հրապարակած ցուցակն էլ դրա վառ ապացույցն է: Նախարարությունը իր այդ ցուցակով վերահաստատեց, որ հետապնդվելու են այն մարդիկ, ովքեր անպաշտպան են, և հարկային դաշտ կբերվեն այն ընկերությունները, որոնք չունեն որևէ հովանավորչություն: Քաղաքական խնդիր դրված չէ, որ ստվերը վերանա»:
Մեր դիտարկմանը, թե այդ դեպքում ինչ է նշանակում Հովիկ Աբրահամյանի հայտարարությունները՝ հուլիսի 1-ը, գիծ քաշելը, Խաչատրյանը նկատեց. «Դուք վարչապետի խոսքերը մեկնաբանում եք այլ կերպ, ես՝ այլ: Ինձ համար պարզ է, որ ստվերը վերացնելու քաղաքական խնդիր դրված չէ: Դեռ ոչինչ չի եղել, կսպասենք մի ամիս էլ և կհամոզվենք, որ կրկին ոչինչ էլ չի լինի: Եվ կհամոզվեք, որ դա ընդամենը շուո է»:
Եթե ամիսներ անց վերջնականապես արձանագրվի, որ Հովիկ Աբրահամյանի օպերացիան ձախողվել է, ի՞նչ պետք է անի Հովիկ Աբրահամյանը՝ հարցրինք ընդդիմադիր Վահագն Խաչատրյանին: «Այդ հարցերի պատասխանը մենք ժամանակին տվել ենք: Իրենք բոլորը պետք է հեռանան: Ձեր տված հարցն էլ այդ շրջանակում է»,-եղավ պատասխանը:
