Վերաքննիչ քրեական դատարանի վարույթում է Արմեն Հայրապետյանի գործով բերված վերաքննիչ բողոքը:
Գործը քննվել է Ավան և Նոր Նորք վարչական շրջանների ընդհանուր իրավասության դատարանի կողմից Դավիթ Հարությունյանի նախագահությամբ:
Տարբեր ազգությունների պատկանող, մաշկի տարբեր գույն ու էկզոտիկ գեղեցկություն ունեցող, տարբեր լեզուներով խոսող կանայք՝ երևանյան գիշերային ակումբի մերկապարուհիներն էին այս գործով տուժողները, ովքեր ներողամտորեն էին վերաբերվում ամբաստանյալի աթոռին նստած, իրենց ակումբի հաճախորդ հանդիսացող և իրենց լավ ծանոթ տղամարդուն:
Մերկապարուհիները հայտնել են, թե հաշտվել են ամբաստանյալի հետ, նրա դեմ բողոք չունեն և չեն առարկել, որ գործը քննվի արագացված կարգով:
Ըստ դատական ակտի՝ 38-ամյա Արմեն Հայրապետյանը 2013 թվականի հոկտեմբերի 17-ին, գիշերվա ժամը 3-ն անց 30-ին քննությամբ չպարզված երկու անձանց հետ զվարճացել է Ջրվեժ-Գառնի ավտոճանապարհին գործող «Մատրյոշկա» գիշերային ակումբում:
Ոգելից խմիչք օգտագործած վիճակում Արմենը «պրիվատ» առանձնասենյակում առանձնացել է նույն ակումբի մերկապարուհի, Կոտ Դ’Իվուարի Հանրապետության քաղաքացուհի Օլգա Ֆլորիայի հետ, առաջարկել է սեռական հարաբերություն ունենալ:
Պարուհին, որ անծանոթ չէր այդ հաճախորդին, մերժել ու դուրս է եկել առանձնասենյակից:
Մերժումը վիրավորական է թվացել խմիչքի ազդեցության տակ գտնվող Արմենին:
Նա առանձնասենյակից դուրս է եկել, մոտեցել ակումբի սրահի բարի մոտ գտնվող Օլգա Ֆլորիային, ապտակել է նրան:
Ըստ մեղադրանքի՝ Արմենը, իր հետ ակումբում գտնվող երկու անհայտ անձանց հետ, անհարգալից վերաբերմունք է դրսևորել ակումբի հաճախորդների ու աշխատողների նկատմամբ, շուրջ տասը րոպե հայհոյել ու ծեծել է Օլգա Ֆլորիային՝ նրա առողջությանը պատճառելով թեթև վնասի հատկանիշներ չպարունակող վնասվածքներ:
Ակումբի անվտանգության աշխատողները Արմենին ու նրա ընկերներին դուրս են հանել ակումբից:
Օլգա Ֆլորիան հեռացել ու թաքնվել է ակումբի մերկապարուհիների բնակության վայր հանդիսացող, Ավան թաղամասում վարձակալված բնակարանում:
Արմեն Հայրապետյանը «բոյեվիկի» հերոսի կեցվածքով ընկերների հետ հետապնդել է Օլգա Ֆլորիային:
Հասել է Ավան:
Մերկապարուհիների բնակարանի մոտ հանդիպել է նույն ակումբի մեկ ուրիշ մերկապարուհու՝ Անժելա Ժիռնովային:
Վերջինիս հարցաքննել է Օլգայի գտնվելու վայրի վերաբերյալ, բայց տեղեկություն չստանալով՝ հիմա էլ այստեղ է հայհոյանքներ տվել մերկապարուհիների հասցեին, բռնություն է գործադրել Անժելա Ժիռնովայի նկատմամբ՝ քաշել է նրա մազերից, հարվածներ է հասցրել՝ նրա առողջությանը նույնպես պատճառելով թեթև վնասի հատկանիշներ չպարունակող վնասվածքներ:
Արմենի ընկերներից մեկն էլ նույն վայրում, նույն թոհուբոհի ժամանակ ծեծել է «Մատրյոշկայի» մյուս մերկապարուհուն՝ Իրինա Կոտյանսկային:
Մերկապարուհիներին պաշտպանելու և ծեծկռտուքը դադարեցնելու փորձեր է արել «Մատրյոշկայի» պահակ Մամբրեն, բայց պարուհներին հայհոյող ու ծեծող տղերքը նրա վրա առանձնապես ուշադրություն չեն դարձրել, ըստ դատական ակտի՝ անհարգալից են վերաբերվել հասարակության նկատմամբ:
Արմեն Հայրապետյանին մեղադրանք է առաջադրվել բռնության գործադրմամբ կատարած խուլիգանության համար՝ ՀՀ քրեական օրենսգրքի 258 հոդվածի 3-րդ մասի 1-ին կետով:
Արմենի հետ խուլիգանություն կատարած ընկերները գործով չեն բացահայտվել:
Ընդհանուր իրավասության դատարանում Արմեն Հայրապետյանն իրեն լիովին մեղավոր է ճանաչել, զղջացել կատարածի համար ու միջնորդել է, որ գործը քննվի արագացված կարգով:
Դատարանը հաշվի է առել, որ Արմեն Հայրապետյանը նախկինում ինսուլտ է տարել, ունի սրտի հետ կապված առողջական խնդիրներ, նրա խնամքին են թոշակառու ծնողները:
Արմեն Հայրապետյանը մեղավոր է ճանաչվել մեղսագրված հոդվածով ու դատապարտվել է 500 հազար դրամ տուգանքի:
Դատավճռի դեմ բողոք է ներկայացրել մեղադրանքը պաշտպանող դատախազը:
Նա միջնորդել է բեկանել դատավճիռը, պատժի մասով խստացնել այն՝ Արմեն Հայրապետյանին դատապարտելով ազատազրկման ձևով համաչափ պատժի:
