«Քրջի» շուկայի տարածքում «Առաջին լրատվական»-ի նկարահանումների ժամանակ շրջում էր նաև դերասան, երգիծաբան Սերգեյ Դանիելյանը: Մեզ հետ զրույցում դերասանն ասաց, որ եթե որևէ իր այս շուկայից անհրաժեշտ է լինում, գնում է, առհասարակ հին վայրեր սիրում է, ասում է՝ ամբողջ աշխարհում նման շուկաներ կան, բայց մեր երկրի վիճակը իրականում սարսափելի է. «Կան բաներ, որոնք տեսնելով՝ հումորս չի գալիս, լացս է գալիս»,- ընդգծել է Սերգեյ Դանիելյանը: Դերասանը չի կարծում, որ նոր կառավարությունը կարող է բարեփոխումներ կատարել։ «Երբեք ոչ մի լավ բան, ոչ մի կառավարության մասին չեմ մտածել ու չեմ ասել, հիմա էլ չեմ պատրաստվում, ես լավ բան չեմ տեսնում, ամբողջ բյուջեն իրենց բիզնես պլանն է, ի՞նչ պիտի փոխեն, ըստ երևույթին, չեն էլ ուզի»,- ասել է դերասանը:
Ըստ նրա՝ ժամանակին իրենք իրենց գործն արել են, հիմա մեր սերնդի հերթն է, պետք է լինենք ըմբոստ, կառավարության որոշումներին դեմ արտահայտվենք։ «Հատկապես կապիտալիստական երկրներում կառավարության անդամները հարստահարող դասակարգի ներկայացուցիչներ են՝ իրենք կուզեն, որ մենք շատ աշխատենք, քիչ ստանանք, մենք չպետք է համաձայնենք, օլիգարխը չի գժվել, որ փող տա»,- ասել է Ս. Դանիելյանը: Ինչ վերաբերում է օլիգարխներին, ապա ըստ նրա՝ ամբողջ աշխարհում օլիգարխները Քաջ Նազարի բախտը ունեն, բայց հետագայում նրանց սերունդները դառնալու են հարուստ, նորմալ մարդիկ, իհարկե այնպիսին չեն լինի, ինչպիսին օլիգարխները հիմա են: Հետաքրքրվեցինք՝ իսկ հիմա օլիգարխներն ինչպիսի՞ն են։ «Անպայմա՞ն է հայհոյանք տամ, օրիորդ ջան, ձեզ հաճելի չի լինի, չեմ ասի, ազիզ ջան»,- պատասխանել է դերասանը:
Անդրադառանալով Հովիկ Աբրահամյանի խոստումներին՝ նա նկատել է, որ ոչ մի կոնկրետ ակնկալիք ոչ ոքից չունի. «Մանավանդ որ կառավարող այս դաշտում մեկը մի քիչ բարեխիղճ է, մեկը՝ մի քիչ ավելի խելոք, մեկը՝ մի քիչ ավելի տուպոյ, դրանից ավել ոչինչ մի սպասեք, չի կարող փոխվել, մինչև դուք ոտքի չկանգնեք ու չստիպեք իշխանությանը ինչ-որ բան փոխել, ուրիշ որևէ մեխանիզմ աշխարհում չկա»,- մանրամասնել է հումորիստը: Ըստ նրա՝ փոփոխության միակ ելքը պայքարն է, հեղափոխություն, արյուն, մտավորականները չեն ուզում, բայց պատմությունը ցույց է տալիս, որ գլոբալ բարեփոխման այլ ելք՝ բացի ընդհանուր ըմբոստությունից չկա, եթե Ֆրանսիայում վախենային հեղափոխություն անել, այնուհետև բարեփոխումներ չէին լինի, աշխարհում բարի ֆեոդալներ, ղեկավարներ չկան, ժողովուրդը պիտի ստիպողի դերում լինի: Սերգեյ Դանիելյանից հետաքրքրվեցինք՝ արդյոք եթե ժողովուրդը ընդհանուր պայքարի դուրս գա, ժողովրդի կողքին կլինի, ոտքի կկանգնի. «Ես միշտ էլ ոտքի կանգնած եմ իմ ներկայացումներով, գրախոսականներով, եթերներով, այսպիսի զրույցներով, եթե պետք լինի քար, երկաթ վերցնել գրավել «բաստիլը», կգնամ», ասել է դերասանը՝ եզրափակելով, որ այսօրվա վիճակը արտացոլվում է իր ներկայացումներում՝ «իդիոտի» և խանգարողների վերաբերյալ:
Առավել մանրամասն՝ տեսանյութում։