«Եթե Սերժ Սարգսյանը հանկարծ Արգենտինայում հասկացավ, որ Ռուսաստանի կողմից Ադրբեջանին զենք վաճառելը մտահոգիչ է՝ Հայաստանը դա հասկացել է շատ ավելի վաղ․ Հայաստանն ու Սերժ Սարգսյանը տարբեր բաներ են»,- «Առաջին լրատվական»-ի հետ զրույցում՝ անդրադառնալով Սերժ Սարգսյանի՝ Ռուսաստանի կողմից Ադրբեջանին զենք վաճառելու հայտարարությանը նման կարծիք հայտնեց «Նախախորհրդարան»-ի անդամ, ռեժիսոր Տիգրան Խզմալյանը:
Մեր զրուցակցի խոսքերով՝ առաջին անգամ չէ, որ Ռուսաստանը Ադրբեջանին զենք է վաճառում՝ այս ամենը սկսվել է դեռ արցախյան պատերազմի տարիներին, երբ ռուսական զորամասերից երկու շարասյունով զենքեր էին վաճառվում և՛ Ադրբեջանին, և՛ Հայաստանին, բայց Ադրբեջանին վաճառվում էին ավիառումբեր, իսկ Հայաստանին որոշ ժամանակ անց սկսեցին տրամադրել հակաօդային սպառազինություններ, որ երկու կողմերի կախվածությունն էլ պահպանվի:
Խզմալյանի կարծիքով՝ եթե Սերժ Սարգսյանը անկեղծ լիներ, այդ մասին կխոստովաներ շատ վաղուց․ «Նա սիրում է իրարամերժ բաներ ասել, վերջերս հայտարարեց, որ Հայաստանին պետք են համակարգային փոփոխություններ, և պատրաստ է առաջնորդել այդ պայքարը: Այսինքն՝ պատրաստ է առաջնորդել պայքարը՝ ինքն իր դեմ՝ դրանով դառնալով Հայաստանի ընդդիմության առաջնորդ: Պետք չէ լուրջ վերաբերվել Սերժ Սարգսյանի ասածներին՝ հատկապես Արգենտինայում ասած»:
Հարցազրույցն ամբողջությամբ՝ տեսանյութում։
