Բոլիվիայի նախագահ Էվո Մորալեսն առաջարկել է Միացյալ ազգերի կազմակերպությունը վերանվանել Ագրեսոր ազգերի կազմակերպություն, քանի որ անընդունելի է համարում այն գործելաոճը, որ որդեգրել է միջազգային հանրությունը Լիբիայի առաջնորդի դեմ պայքարում: Այս մասին հաղորդում է Reuters գործակալությունը:
«Որպես խաղաղասեր երկիր՝ մենք խնդրում ենք անմիջապես դադարեցնել ներխուժումը և ռազմական ագրեսիան Լիբիայի դեմ, ինչպես նաև կոչ ենք անում ստեղծել բարձր մակարդակի միջազգային հանձնաժողով ՄԱԿ-ի գլխավոր քարտուղար Պան Գի Մունի, Արաբական երկրների լիգայի և Աֆրիկյան միության ներկայացուցիչների մասնակցությամբ` Լիբիայում առկա հակասություններն ու խնդիրները լուծելու համար»,- ասել է Մորալեսը:
Նրա խոսքերով, չի կարելի պաշտպանել մարդու իրավունքներն ու միաժամանակ խախտել դրանք՝ ռումբեր նետելով հիվանդանոցների վրա ու սպանելով մարդկանց: Նա նաև զարմանք է արտահայտել, թե ինչպես է խաղաղության մրցանակակիրը` Օբաման, նպաստում ռմբակոծություններին` գլխավորելով մի խումբ ագրեսորների ոհմակը: