Լոռու մարզի ընդհանուր իրավասության դատարանում Աղասի Մկոյանի նախագահությամբ ավարտվել է Վանիկ Ջուլհակյանի գործի դատական քննությունը:
31-ամյա Վանիկը ծնողների՝ առաջին կարգի հաշմանդամ հոր՝ Սամվելի ու մոր՝ Մանուշակի հետ ապրել է Լոռու մարզի Ուռուտ գյուղում:
Շուրջ չորս տարի առաջ Սամվել Ջուլհակյանն ինսուլտ է տարել, նրա մարմնի ձախ կողմը թուլացել է: Նա տեղաշարժվել է ձեռնափայտերի օգնությամբ, իսկ 2012 թվականին անդամահատել են նրա ձախ ոտքը:
Դրանից հետո Սամվել Ջուլհակյանը տեղաշարժվել է հաշմանդամի սայլակով: Նա ինքնուրույն շարժվել, հագնվել, սնվել չի կարողացել:
Սամվելի որդին՝ Վանիկը, չի աշխատել, չարաշահել է ալկոհոլը, իսկ խմիչքի ազդեցության տակ դարձել է ագրեսիվ:
Երբ հայրը դիտողություն է արել, Վանիկը վիճաբանել է նրա հետ, երբեմն ծեծել, երբեմն էլ սայրով կամ դանակով վնասել է իր նախաբազուկները:
2013 թվականի սեպտեմբերի 4-ին, ժամը 11-ից մինչև 17-ը Վանիկ Ջուլհակյանը իրենց տանը մենակ խմել է երկու շիշ օղի:
Ժամը17-ից մինչև 20-ը նա տանը գոռգոռացել ու «ճվացել է»:
Մայրը վախեցել է, որ Վանիկը կվնասի իրեն, փախել ու թաքնվել է տանից մոտ 38 մետր հեռավորության վրա գտնվող եգիպտացորենի դաշտում (ամերիկյան սարսափ ֆիլմի դրվագ է հիշեցնում):
Հաշմանդամ հայրը՝ Սամվել Ջուլհակյանը, մնացել է պատշգամբում, սայլակի մեջ նստած:
Վանիկը, գտնվելով ալկոհոլի ազդեցության տակ, վիճել է հոր հետ: Վիճաբանության ընթացքում նա խոհանոցից վերցրած դանակով մեկ անգամ հարվածել է հոր կրծքավանդակի աջ կեսին՝ պատճառելով ծակած-կտրած, թափանցող վերք՝ աջ թոքի վերին բլթի վնասումով, աջակողմյան հեմոպնևմոթորաքսով:
Զայրացած Վանիկը հորը դանակահարելով չի հանգստացել, նա պատշգամբում դրված երկու աթոռներն ու մեկ ապակե բաժակը նետել է բակ:
Այնուհետև տեսել է, որ հոր կրծքի վնասվածքից արյուն է հոսում: Վանիկը հորը տարել-պառկեցրել է անկողնում, տնից դեղին թելի կծիկն ու ասեղ է վերցրել, արյունահոսությունը դադարեցնելու նպատակով կարել է հոր կրծքի վնասվածքը: Մոտ 15 րոպեի ընթացքում Սամվել Ջուլհակյանը մահացել է:
Վանիկը խոհանոցից մի ուրիշ դանակ է վերցրել ու իր նախաբազուկների շրջանում կատարել է ինքնավնասումներ, դրանից հետո էլ շարունակել է օղի խմել:
Նախաքննական մարմինը Վանիկ Ջուլհակյանին մեղադրանք է առաջադրել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ընդհանուր իրավասության դատարանում Վանիկն իրեն մեղավոր չի ճանաչել: Նա հայտնել է, թե հորը դանակով ինքը չի հարվածել ու չի սպանել: Ինքը, ճիշտ է, չարաշահել է ոգելից խմիչքը, դրա պատճառով հոր հետ լարված հարաբերությունների մեջ է եղել:
Հայրը հաճախ իրեն վիրավորել ու հայհոյել է, մանավանդ, երբ հեռախոսով խոսել է Ռուսաստանում ապրող քրոջ հետ:
Դեպքի օրը՝ սեպտեմբերի 4-ին, ինքը խմել է, հայրը սայլակի վրա նստած՝ հայհոյել է իրեն: Ինքը չի արձագանքել: Մտել է տուն ու շարունակել է օղի խմել:
Երբ հայրը լռել է, ինքը պատշգամբ է դուրս եկել, տեսել է, որ պատշգամբում նստած հոր կրծքավանդակը ամբողջովին արյունոտ է: Ենթադրել է, որ հայրն ինքն իրեն հարվածել է դանակով: Նպատակը եղել է իր «գլխին սարքելը, որովհետև ամպուտացված ոտքի պատճառով հայրը չի կարողացել իրեն ծեծել ու անճարակությունից դիմել է այդ քայլին»…
Ինքը կանչել է մորը, բայց մայրը տանը չի եղել: Դուրս է եկել փողոց, որ մարդ կանչի, բայց մարդ չի եղել:
Վերադարձել է տուն, հորը օգնելու նպատակով տեղափոխել է անկողին, տան դարակից թել ու ասեղ է վերցրել, արյունահոսությունը դադարեցնելու նպատակով կարել է հոր կրծքավանդակին առկա վերքը:
Կարել է հորը վնասված տեսնելուց մոտ մեկ ժամ անց: Երբ կարել է, հայրը շարժվել է, բայց չի արձագանքել:
Կարելուց հետո տեսել է, որ հայրն այլևս չի շարժվում:
Գնացել է խոհանոց: Դանակով վնասել է իր դաստակները, որ հանգստանա:
Հետո եկել են ոստիկաններն ու իրեն բերման ենթարկել ոստիկանություն:
Նախաքննության ընթացքում Վանիկ Ջուլհակյանը տվել է խոստովանական ցուցմունքներ: Հորը դանակով խփելը պատճառաբանել է իր հարբածությամբ, ասել է, թե չի հասկացել՝ ինչ է անում:
Դատաբժշկական փորձաքննության եզրակացությամբ բացառվել է, որ հաշմանդամ Սամվել Ջուլհակյանը կարողանար ինքն իրեն դանակով պատճառել այն վնասվածքը, որն առկա էր նրա կրծքավանդակի աջ կեսին:
Տարբեր են եղել տուժողի իրավահաջորդ ճանաչված, միաժամանակ Վանիկի մայրը հանդիսացող Մանուշակի նախաքննական ու դատաքննական ցուցմունքները:
Դատաքննության ժամանակ Մանուշակն ասել է, թե որդին՝ Վանիկը, ալկոհոլը չի չարաշահում: Նա իր հետ հոգացել է հաշմանդամ հոր հոգսերը:
Դեպքի օրը Վանիկը խանութից պաղպաղակ ու ձմերուկ է գնել: Ինքը պաղպաղակը կերել է ու գնացել է եգիպտացորենի դաշտ՝ անասունների համար կեր բերելու, բայց այնտեղ ուշագնաց է եղել:
Ուշքի է եկել, գնացել է դեպի տուն: Ճանապարհին հանդիպել է ամուսնու եղբորորդուն: Նրա հետ իրենց տուն են մտել, հայտնաբերել են ամուսնուն՝ անկողնում պառկած՝ արյունոտ ու մահացած: Ինքը ենթադրում է, որ ամուսինն ինքն իրեն խփել է դանակով:
Նախաքննության ժամանակ Մանուշակն ասել է, որ Վանիկը չարաշահել է խմիչքը, խմած ժամանակ դարձել ագրեսիվ, գոռացել ու «ճվացել է», ջարդել տան իրերը, դանակով կամ սայրով վնասել իր դաստակները, վիճել է հաշմանդամ հոր և իր հետ:
Դեպքի օրը Վանիկը խմել է, ինքը վախեցել է նրանից ու թաքնվել է տանից ոչ հեռու գտնվող եգիպտացորենի դաշտում:
Տան կողմից լսել է որդու գոռգոռոցներն ու հայհոյանքները:
Մի պահ լսել է ամուսնու ձայնը, որ կանչում էր՝ Մանուշ, Մանուշ, բայց վախեցել է դուրս գալ ու տուն չի գնացել: Երբ մութն ընկնելիս է եղել, փողոցում նկատել է դաշտից տուն վերադարձող Վարդին՝ ամուսնու եղբորորդուն: Նրա հետ մտել է իրենց բակ:
Տեսել են, որ Վանիկը կանգնած է ծառերի տակ: Տանը հայտնաբերել է ամուսնու դիակը… Դեպքի պահին տանը եղել են ամուսինն ու որդին…
Սամվել Ջուլհակյանին գյուղում «Ռուս» էին ասում:
Գյուղի խանութի աշխատողը հայտնել է, որ դեպքի օրը, ժամը 19-ից 20-ն ընկած ժամանակահատվածում խանութ է եկել Վանիկ Ջուլհակյանը՝ խմած վիճակում: Նա 1530 դրամով գնել է 1 շիշ օղի ու 1 շիշ գարեջուր: Ինքը նրա նախաբազուկների շրջանում թարմ վնասվածքներ է նկատել: Բարակ վերնաշապիկի տակից երևացել է անդրավարտիքի գոտկատեղում խրված խոհանոցային դանակը, որի մոտ 15 սանտիմետր երկարությամբ սայրն ուղղված է եղել դեպի վեր: Շեղբը պարզ արտատպվել է բարակ վերնաշապիկի տակից:
Վանիկը օղին ու գարեջուրը գնել է, խանութից դուրս է եկել, նստել խանութի մոտ գտնվող կշեռքի վրա, բացել է գարեջուրն ու ասել. «Խմում եմ օղորմածիկ Ռսի կենացը»…
Մոտ կես ժամ անց Վանիկը նորից խանութ է գնացել, ցանկացել է ևս մի շիշ օղի գնել, բայց վաճառողը նրան մերժել է ու խանութը փակել…
Գյուղացիների խոսքով՝ հաշմանդամ Սամվել Ջուլհակյանը բնավորությամբ եղել է հանգիստ, շփվող մարդ…
Վանիկ Ջուլհակյանը ճանաչվել է մեղսունակ: Ըստ դատաբժշկական փորձաքննության եզրակացության՝ նա տառապում է խրոնիկ ալկոհոլիզմով:
Փորձաքննության ժամանակ Վանիկը «միօրինակ կրկնել է, թե խմած վիճակում չի հասկանում, թե ինչ է անում, դեպքի մանրամասները չի հիշում, իր ապրելը միտք չունի, ինքը ոչ մեկին պետք չէ, ամաչում է նայել մարդկանց աչքերին, դարձել է «հայրասպան»:
Փորձաքննության ժամանակ ևս Վանիկ Ջուլհակյանը փոքր սայրով ինքնավնասումներ է կատարել աջ և ձախ նախաբազուկներին:
Ընդհանուր իրավասության դատարանը Վանիկ Ջուլհակյանին մեղավոր է ճանաչել հորը դիտավորյալ սպանելու համար՝ ՀՀ քրեական օրենսգրքի 104 հոդվածի 1-ին մասով, և դատապարտել է 11 տարի ազատազրկման:
Պատժի սկիզբը՝ 2013 թվականի սեպտեմբերի 5-ից:
Վանիկ Ջուլհակյանի նկատմամբ նշանակվել է հարկադիր բուժում ալկոհոլամոլությունից՝ ըստ պատիժը կրելու վայրի:
