Այսօր «Հայացք» ակումբում լրագրողների հետ հանդիպմանն անդրադառնալով հոկտեմբերի 27-ին Աստրախանում ընդունված` Սարգսյան-Ալիեւ-Մեդվեդեւ եռակողմ հռչակագրին՝ Հայ ազգային կոնգրեսի ներկայացուցիչ Դավիթ Շահնազարյանը ուշադրություն հրավիրեց մի կարեւոր փաստի վրա. «Դրական է այն, որ հռչակագիրը ունի հումանիտար ուղղվածություն, բայց այդ հռչակագիրը ե՛ւ Հայաստանի, ե՛ւ Արցախի համար ունի շատ վտանգավոր քաղաքական եւ միջազգային իրավունքի տեսակետից` իրավական բովանդակություն: Նախագահների մակարդակով ստորագրվել է մի փաստաթուղթ, որով Հայաստանը ընդունել է, որ գտնվել է եւ գտնվում է պատերազմի մեջ Ադրբեջանի դեմ: Ցավոք սրտի, այս փաստաթղթով շատ դժվար է դա վիճարկել: Ընդ որում` պատերազմի երրորդ կողմ չկա՝ ըստ այդ հռչակագրի: Եթե երկու պետություններն ամենաբարձր մակարդակով պայմանավորվածության են գալիս ռազմագերիների հարցում, սա պարզապես նշանակում է, որ նրանց միջեւ եղել է եւ կա պատերազմ` այստեղից բխող քաղաքական եւ իրավական բոլոր ծանր հետեւանքներով»: Աննախադեպ փաստաթուղթ համարելով Աստրախանի հռչակագիրը՝ Դ.Շահնազարյանը հավելեց, որ «ռազմագերին» միջազգային իրավունքով հստակ սահմանված ձեւակերպում է, դա վերաբերում է միայն պատերազմող երկրներին, եւ նույնիսկ այն չնչին հնարավորությունները, որոնք մնացել էին Լեռնային Ղարաբաղը` բանակցությունների սեղանին վերադարձելու, Աստրախանի հռչակագրով, ըստ Կոնգրեսի ներկայացուցչի, «արդեն գոյություն չունեն»: Դ.Շահնազարյանը նշեց նաեւ, որ Ադրբեջանն Աստրախանի փաստաթղթով ստացել է շատ լուրջ ձեռքբերում, ավելին, քան մինչ այժմ ընդունված մյուս հայտարարություններն էին:
«Առաջին լրատվականի» դիտարկմանը, որ բանակցող կողմերը մշտապես էլ հայտարարել են, որ գտնվում են` ո՛չ խաղաղություն, ո՛չ պատերազմ իրավիճակում, հետեւաբար Աստրախանի հայտարարությունը որքանո՞վ կարելի է անակնկալ համարել, Դ.Շահնզարյանը պատասխանեց. «Կողմերը բազմաթիվ իրարամերժ հայտարարարություններ են արել: Սա լրջագույն փաստաթուղթ է: Երկրորդը` հակամարտության ամբողջ էությունը 1998-ից սկսել է խեղաթյուրվել եւ այս փաստաթղթով սկսվում է մի նոր, շատ ավելի ծանր փուլ: Ամբողջովին վերցնելով պատասխանատվությունը այս փաստաթղթով` Հայաստանը հայտարարում է, որ` այո, Հայաստանը եւ Ադրբեջանը միմյանց հետ պատերազմել են, կա ռազմագերիների խնդիր եւ պատերազմը մինչեւ հիմա մնում է, այսինքն` ընդհանրապես Լեռնային Ղարաբաղը՝ որպես սուբյեկտ, այս փաստաթղթով արդեն իրավականորեն վերացվում է »:
