«Ֆայլա բազարում» մշտական անդամներ կան, այսպես ասած՝ փորձառուները, որոնք աշխատանքի իրենց մեթոդն ունեն, ասում են՝ պոտենցիալ հաճախորդներին գրավել է պետք, ավելի ճիշտ՝ նրանց ուշադրության կենտրոնում հայտնվել, միջոցը հայտնի «Էստի համացեք»-ի նման է, միայն թե այս պարագայում կանգնում են ու դանդաղ քայլող անցորդներին հեռվից դիմավորում՝ «գործ կա՞, աշխատող է պե՞տք» հարցադրումներով: Շուկայի գործազուրկները տարբեր աշխատանքներ են կատարում, վճարվում են օրավարձով:
«Առաջին լրատվական»-ի հետ զրույցում շուկայի աշխատակիցները նշեցին, որ արհեստավորները 5 հազար դրամ են վաստակում, բանվորները՝ 2 հազար դրամ, միայն թե լինում են դեպքեր, երբ ամիսներով գործ չեն ունենում, ասում են՝ հարուստները նախկինում իրենց ծառայություններից շատ էին օգտվում, հիմա ՝ոչ:
Բանվորները, վարպետները նաև ընդգծում են, որ իրենց շարքերում կան բարձրագույնն ավարտածներ, բայց աշխատանք չեն կարողանում գտնել, ուստի տուն պահելու միակ միջոցը մնում է տաժանակիր աշխատանքը՝ բեռ են տեղափոխում, հող են փորում, պատշարություն, տան վերանորոգում են կատարում: Այստեղ ժամանակավոր աշխատանք են փորձում գտնել նաև այն անձինք, ովքեր առողջական լուրջ խնդիրներ ունեն:
Բանվորների մի մասը ցանկանում է լքել երկիրը, մյուս մասն էլ չի ուզում, ասում են՝ ինչո՞ւ պիտի իրենց ընտանիքի անդամներից հեռու լինեն: Այստեղ կառավարության վրա բարկացած են, ասում են՝ այլևս հույս չունեն, որ երկիրը կարող է նորմալ կառավարվել:
Շուկայում զարմացած էին, որ իրենց հետ զրուցում էինք: «Ինտերվյու գնացեք ձեր նախագահից վերցրեք, մուկից վերցրեք, մուկ ա, կատու ա, ով ա»,- ասում էին շուկայում ու հավելում. «Հովիկ Աբրահամյանը ով ա՞, արաղ փակող չի՞»:
Առավել մանրամասն՝ տեսանյութում: