Ճապոնական «Ֆուկուսիմա-1» ատոմակայանի մերձակա ջրերում արձանագրվել է ճառագայթման բարձր մակարդակ: Խաղաղօվկիանոսյան ջրերում ռադիոակտիվ յոդի նորման գերազանցվում է 126 անգամ, իսկ ցեզիումինը` 25 անգամ: Այս մասին հաղորդել է France24 հեռուստաալիքը: Ընդ որում, այս ստուգումներն իրականացվել են Ֆուկուսիմայից 100 կմ հեռավորության վրա: Ճապոնացի պաշտոնյաները հայտարարում են, որ հնարավոր է՝ ռադիոակտիվ նյութերն այդտեղ հայտնվել են վերջերս տեղացած անձրևի պատճառով: Բնապահպանները չեն կարողացել ասել, թե ինչ ազդեցություն դա կարող է ունենալ բնության վրա, սակայն նշել են, որ այդ նյութերը շատ կարճ ժամանակահատվածում քայքայվում են: Ըստ ՄԱԳԱՏԵ-ի մասնակիցների` ճառագայթման մակարդակը ատոմակայանից ոչ հեռու գտնվող քաղաքներում 1,600 անգամ ավել է նորմայից:
Երեկ մենք տեղեկացրել էինք, որ ճառագայթման բարձր մակարդակ էր գրանցվել նաև այդ պրեֆեկտուրայում արտադրված բանջարեղենում և կաթում, ինչպես նաև Տոկիոյի ջրամատակարարման համակարգում: Այդուհանդերձ ճապոնական իշխանությունները հայտարարել են, որ այդ չափաբաժինները չեն կարող վնաս հասցնել մարդու առողջությանը:
Ճապոնիայի կառավարության գլխավոր քարտուղար Յուկիո Էդանոն նույնիսկ հայտարարել է, որ այն շրջաններում գտնվելը, որտեղ հայտնաբերվել է ճառագայթման բարձր մակարդակ, մարդու առողջությանն այնքան վնաս չի հասցնի, որքան երկար թռիչքը ինքնաթիռով կամ տոմոգրաֆիական հետազոտությունը:
Այդուհանդերձ, քիչ առաջ «Ֆուկուսիմա-1» ատոմակայանի էներգաբլոկների վրա նորից երևացին գոլորշու ամպերը, ինչը կարող է վկայել, որ ատոմակայանը շահագործող TEPCO ընկերությունը ստիպված է եղել նորից բաց թողնել ռադիոակտիվ գոլորշին` պայթյունից խուսափելու համար: