Այն, ինչ այս օրերին տեղի է ունենում Եմենում, շատ նման է արաբական մյուս երկրներում` Եգիպտոսում և Լիբիայում, տեղի ունեցող իրադարձություններին:
Երեկ Եմենի հատուկ ծառայությունները ներխուժել են քաթարյան Al-Jazeera հեռուստաալիքի գարսենյակ և խլել հեռարձակումներն իրականացնելու համար անհրաժեշտ բոլոր սարքավորումները (նույնը տեղի էր ունեցել Կահիրեում, քանի որ այս ալիքը միակն էր, որ ուղիղ եթերում ներկայացնում էր Եգիպտոսի իրադարձությունները):
Չնայած այդ հանգամանքին՝ Al-Jazeera-ն ուղիղ եթերում ցուցադրում է մայրաքաղաք Սանա’այի հրապարակներից մեկում տեղի ունեցող ընդդիմադիրների ցույցը, որոնք պահանջում են նախագահ Ալի Աբդալլահ Սալեհի հրաժարականը:
Սալեհի օգտին չէ նաև այն փաստը, որ երեկ Ֆրանսիայի արտաքին գործերի նախարար Ալեն Ժյուպեն հայտարարել է, որ Սալեհը պետք է գնա. «Մենք կարծում ենք, որ Սալեհի հեռանալն անխուսափելի է», ասել է Ժյուպեն:
Եմենում իրավիճակը շարունակում է մնալ լարված՝ չնայած երեկ Եմենի պաշտպանության նախարարը հանդես է եկել հեռուստաուղերձով և հայտարարել, որ դասալիք գեներալներին թույլ չի տա պետական հեղաշրջում կատարել և կպաշտպանի գործող նախագահին: Այս մասին հաղորդում է France Presse գործակալությունը: Հիշեցնենք, որ երեկ մի քանի գեներալներ և ավելի քան 60 սպաներ հրաժարվել էին ենթարկվել գործող իշխանությանը, զորքեր էին մտցրել երկրի մայրաքաղաք և հայտարարել, որ թույլ չեն տա, որ խաղաղ ցուցարարների վրա կրակ բացեն: Նախագահ Սալեհի համար մտահոգիչն այն է, որ հրաժարական տված երկու գեներալները նույն ցեղից են, որից հենց ինքը` Սալեհն է:
Երեկ մենք տեղեկացրել էինք նաև, որ Սալեհը Սաուդյան Արաբիային խնդրել է միջնորդական դեր ստանձնել ներեմնյան հակամարտությունում: Այսօր լրատվամիջոցները փոխանցել են, որ Եմենի արտգործնախարարը Սալեհի նամակը տարել է Էր-Ռիյադ: Ենթադրություններ կան, որ հնարավոր է Սալեհը փորձում է հիմք նախապատրաստել` Սաուդյան Արաբիայում ապաստաան գտնելու համար՝ չնայած երկու երկրների հարաբերությունները ավանդաբար լարված են համարվում, իսկ Սալեհը դրանում քիչ «ներդրում» չունի:
«Դասալիք» մի քանի դիվանագետներին երեկ միացել են նորերը: Associated Press գործակալության հաղորդմամբ, ցուցարարների պահանջներին միանալու մասին են հայտարարել Եգիպտոսում և Արաբական երկրների լիգա կազմակերպությունում Եմենի դեսպանները: Այդ պահանջները պաշտպանելու մասին են հայտնել նաև Վաշինգտոնում 4 դեսպաններ:
