ԱՄՆ պետդեպարտամենտն աջակցում է սիրիական ընդդիմության հետ Ռուսաստանի հնարավոր երկխոսությանը: Նման դիրքորոշման մասին հայտնել է պետդեպի ներկայացուցիչ Վիկտորյա Նուլանդը: Նրա խոսքով՝ Վաշինգոնը կանոնավոր կապեր է պահում Մոսկվայի հետ սիրիական հարցով: Այս մասին փոխանցում է RBK-ն:
«Մենք գտնվում ենք ընդդիմադիրների և մեր միջազգային գործընկերների հետ մշտական երկխոսության մեջ այն մասին, թե ինչպես ավելի լավ բաշխել պարտականությունները, և ինչ է պետք անել: Մենք հայտարարել ենք ռուսական կողմին, որ կողջունենք նրա մասնակցությունը այդ գործընթացում, սակայն դրա մեկնարկի պայմանը հանդիսանում է Բաշար Ալ-Ասադի հեռանալու անհրաժեշտության ընդունումը»,- ասել է Նուլանդը: Նա հավելել է, որ ներկայումս ինքը չունի տեղեկություն Մոսկվայի դիրքորոշման փոփոխման մասին:
Պետդեպարտամենտում ընդգծել են, որ ԱՄՆ-ն չի ողջունում Բաշար Ասադի ռեժիմին ուղղված ցանկացած օգնություն, այդ թվում՝ ռուսական կողմից:
Ավելի վաղ ԶԼՄ-ներում տեղեկություն էր հայտնվել, որ Ռուսաստանը սիրիական իշխանությունների պատվերով ազգային արժույթի թղթադրամներ է տպում:
