Բոլոր կողմերը փորձում են օգտագործել Ղարաբաղյան հակամարտությունը: «Առաջին լրատվական»-ի հետ զրույցում այս մասին ասաց ՌԱՀՀԿ ղեկավար, քաղաքական վերլուծաբան Մանվել Սարգսյանը՝ անդրադառնալով ԵԱՀԿ Մինսկի խմբի ամերիկացի համանախագահ Ջեյմս Ուորլիքի գրառմանը, թե ստատուս քվոն վտանգավոր է դառնում:
Նա նշեց, որ համանախագահները սովորաբար պնդում են, թե ԼՂ հակամարտության կարգավորման հարցում տարաձայնություններ չունեն: Սակայն, ըստ նրա, նրանց հայտարարությունները վկայում են այն մասին, որ կան տարաձայնություններ, քանի որ ամերիկյան կողմն անընդհատ փորձում է բոլորին հիշեցնել գոյություն ունեցող վիճակի, խաղի կանոնների մասին՝ զգալով, որ Ռուսաստանն այլ պատկերացում ունի հակամարտության կարգավորման հարցում:
Փորձագետն ասաց, որ Ռուսաստանի նպատակն է տարածաշրջանում ռուսական զորքերի տեղակայումը, Ադրբեջանին զենքով ապահովումը, որի պարագայում բնական է, որ ԱՄՆ ու Ֆրանսիայի կողմից փորձեր են արվում հավասարակշռել իրավիճակը՝ երևի թե Ռուսաստանին հասկացնելու համար, որ նա չի կարող տարածաշրջանում միակողմանի թելադրել:
«Երբ ասում են՝ ստատուս քվոն վտանգավոր է, բնական հարց է ծագում, թե ինչ փոփոխություն պետք է լինի: Էականը դա է: Հիմա Ռուսաստանը ուզում է զորքեր տեղակայել, Ամերիկան՝ տարածքներ հանձնենք, այսինքն՝ ստատուս քվոյի փոփոխությունը տարբեր ուղղություններ ունի, այդ փոփոխությունների մասին կոնկրետ չի խոսվում: Այնպիսի փոփոխություններ են պետք, որոնք ռեալ հնարավոր են: Ադրբեջանի մոտեցումը հետևյալն է. սա մերն է՝ կամ խաղաղ տվեք մեզ, կամ մենք կփորձենք ուժով վերցնել:
Այս իրավիճակում ինչ կարող ենք առաջարկել ու ինչ կարող ենք անել: Կարգավորման մասին ներկայումս դժվար է խոսել: Ունենալով այսպիսի տեսակետ՝ Ադրբեջանը թույլ չի տա կարգավորում: Փոխվում են միջազգային հարաբերություններն ու միջազգային դիրքորոշումները. սա է , որ իսկապես երևում է: Ստատուս քվոն միայն տարածաշրջանային պարամետրերը չեն, այլ նաև միջազգային դիրքորոշումները, վերաբերմունքը, իսկ այդ միջազգային դիրքորոշումները կտրուկ փոխվում են: Մենք տեսնում ենք՝ ինչ է կատարվում Ռուսաստանում, Արևմուտք-Ռուսաստան հարաբերություններում, տարածաշրջանում ամեն ինչ փոխվում է: Ուստի շատերը կարծում են, որ արդեն իսկ տարածաշրջանային պարամետրերը պահպանելը դժվարանում է: Սակայն ինչ են առաջարկում ու ինչն է ռեալ այդ առաջարկվածի մեջ՝ շատ դժվար է ասել»,- մեկնաբանեց Մանվել Սարգսյանը:
Վերջինս ասաց, որ նոր իրավիճակում Ռուսաստանը լավ չի հասկանում՝ ինչ է ցանկանում. «Ռուսաստանը շատ է հետաքրքրված Ադրբեջանով և ամեն կերպ փորձում է Ադրբեջանին ներքաշել իր ինտեգրացիոն պրոյեկտների մեջ. խնդիրը դա է: Իսկ Ադրբեջանը, բնականաբար, ամեն տեղ Ղարաբաղ է տեսնում: Բայց մենք տեսանք Լավրովի հայտարարությունը Բաքվում, երբ ասաց, որ պետք չէ այդ խնդիրները խառնել իրար, որը ևս դիրքորոշում է և կարևոր դիրքորոշում, այսինքն՝ նա չի կապում դրանք իրար հետ: Իսկ թե դա ինչ է նշանակում՝ Ռուսաստանը գիտի:
Չեմ կարծում, թե այս իրավիճակում որևէ երկիր հստակ դիրքորոշում ունի, բոլորը փորձում են օգտագործել Ղարաբաղյան հակամարտությունը, առևտրի առարկա դարձնել, իրար զսպելու առարկա»,- ասաց նա:
Անդրադառնալով եվրասիական ինտեգրացիոն պրոյեկտներին՝ նա ասաց, որ Հայաստանը չի միանա այդ պրոյեկտներին, քանի որ Ադրբեջանը հրաժարվեց մասնակցել դրանց, իսկ Հայաստանը Ռուսաստանին հետաքրքիր էր այդ պրոյեկտներում Ադրբեջանին ներքաշելու համար: