ՀՀ-ԵՄ բանակցությունները պետք է սկսվեն մինչ Հայաստանի կողմից եվրասիական ինտեգրացիայի որևէ փաստաթղթի ստորագրումը: Այս մասին այսօր «Առաջին լրատվական»-ի հետ զրույցում ասաց Հայաստանում Գերմանիայի արտակարգ և լիազոր դեսպան Ռայներ Մորելը:
Հարցին՝ ի՞նչ կարելի է սպասել ՀՀ-ԵՄ հարաբերություններից, եթե Հայաստանի ապագան անորոշ է եվրասիական ինտեգրացիոն պրոյեկտներում, նա պատասխանեց, թե դեռ կտեսնենք՝ ի՞նչ ուղղությամբ են ընթանում զարգացումները: «Նախագահն ասաց՝ ցանկանում ենք միանալ ՄՄ-ին, դուք մեծ աշխատանք եք կատարել՝ միանալու այդ պրոյեկտներին: Հիմա շատ ակնհայտ չէ, ավելի ու ավելի է ուշացել, կտեսնենք, գուցե տարվա վերջին, հիմա սա է կարծես թե ամենանորը, բայց ես կարծում եմ, որ պետք է սպասենք ու տեսնենք, թե ինչ է տեղի ունենում այնտեղ: Ես չեմ կարող ասել, թե կարող է մեկ այլ կարծիք լինել, որ Հայաստանը կասի, եթե երկար է տևում, ապա պետք է դադարեցնել, պետք է այլ բաներ անել: Ոչ, ես կարծում եմ, որ պետք է սպասել ու ես չեմ ուզում ինչ-որ բան ասել, պետք է տեսնենք՝ ինչ է ասում իշխանությունը, ինչ է անում: Առայժմ իշխանությունն ասում է, որ պետք է միանա Մաքսային միությանը, բայց ցանկանում է շարունակել գործակցությունը ԵՄ-ի հետ: Երկուսն էլ հնարավոր է»,- ասաց դեսպանը:
Վերջինս ասաց, որ ՀՀ-ԵՄ բանակցությունները կարող են սկսվել ավելի շուտ: Ըստ նրա՝ պետք չէ, որ սպասենք մինչև հաջորդ տարի, երկու տարի հետո, որպեսզի փաստաթուղթ ստորագրվի ՄՄ-ի հետ: «Մենք պետք է տեսնենք նաև այն, թե Բրյուսելում ինչ նոր հանձնաժողով է ձևավորվում, նրանք պետք է վերամտածեն, նոր մարդիկ են լինելու: Դա ժամանակ է խլում՝ մինչ բոլորը կհավաքվեն ու պատրաստ կլինեն խոսելու այս հարցի մասին: Ես լավատես եմ, դա խնդիր չէ ինձ համար: Գուցե ես շատ լավատես եմ, բայց իսկապես տեսնում եմ, որ իրավաբանական տեսանկյունից դա հնարավոր է՝ աշխատել միասին»,- ասաց դեսպանը:
