«Ղարաբաղ» կոմիտեի անդամ Աշոտ Մանուչարյանից այսօր «Առաջին լրատվական»-ը հետաքրքրվեց, թե ի՞նչն է պատճառը, որ ձգձգվում է Հայաստանի՝ Եվրասիական տնտեսական միությանը միանալու գործընթացը, արդյո՞ք պայմանավորված է Ղարաբաղյան հիմնահարցով:
Մեր հարցադրմանն ի պատասխան՝ Ա․ Մանուչարյանն ասաց․ «Հիմա շատ ավելի խոշոր բան է կատարվում, և դրա բաղկացուցիչ մասերն են և Ձեր թվարկածները դարձել են գործիք մի այլ հարցի լուծման համար: Դրվում է մեկ հարցի քննարկում՝ գործող աշխարհակարգը պահպանվելո՞ւ է, թե ոչ: Դրա ամենակիզակետ գործողություններից մեկն այն է, ինչ տեսնում ենք Ուկրաինայում, երկրորդ՝ այն, ինչ տեսնում ենք Իրաքում: Հաջորդաբար՝ Եվրասիական տնտեսական միության մեջ եղած հարցերը, Ղարաբաղյան հիմնահարցը և այդպես շարունակ: Հիմա հարցը հետևյալն է. կկարողանա՞ն այն ուժերը, որոնք ցանկանում են պահպանել գործող աշխարհակարգը, դա անել, թե՞ հակառակը՝ կհաղթեն նրանք, ովքեր ուզում են փոխել դա»:
Պարոն Մանուչարյանից հետաքրքրվեցինք նաև, թե արդյո՞ք Ռուսաստանի կողմից նահանջ էր այն, ինչ տեղի ունեցավ Սլավյանսկում․ «Ընդհանրապես Ուկրաինայում այն, ինչ կատարվում էր՝ կատարվում էր մեկ իմաստով: Մի ուժ, որ կոչվում է Ռուսաստան, փորձեց ընդվզել աշխարհակարգի դեմ: Անմիջապես թե ներսից, թե դրսից հարված ստացավ, դրսի հարվածը Ուկրաինան էր, որ փորձում է մաքսիմալ թշնամանալ Ռուսաստանի հետ»,- պատասխանեց նա:
Նրա խոսքերով՝ Ռուսաստանի ներսում կան ուժեր, որոնք փորձում են իրենց փողը, կողոպուտը պահպանելու համար պաշտպանեն այն ուժերի դրսևորումը, և կան ուժեր, որ հակառակն են գործում:
Հարցին, թե այդ ներսի պայքարում ո՞ր ուժն է դոմինանտ, մեր զրուցակիցն ասաց․ «Այսօր դժվար է կանխագուշակել մի բան: Որովհետև տառացիորեն վաղը այն ուժերը, որ այս համակարգի մեջ տեսնում են վտանգ և համարում են, որ այն հնացել է, կարող են վերև բարձրանալ: Միացյալ Նահանգների կառավարությունն է գործիք, իսկ ժողովուրդը գործիք չէ, նրանք շատ բան չեն հասկանում»:
Պարոն Մանուչարյանի խոսքերով՝ Ռուսաստանի մասին մի հեքիաթ կա․«Այ, Ռուսաստանը ջղային քեռիէ, դուրս եկավ հարձակվեց, փորձում էր ուտել, ինչ-որ բան պոկել՝ այդ ամենը հեքիաթ է: Իրականում լրիվ այլ բան է եղել, Ռուսաստանին որոշել են պատժել»:
Հարցազրույցն ամբողջությամբ՝ մեր տեսանյութում։