Այսօր «Անի» հյուրանոցում կազմակերպված «Սահմանադրական բարեփոխումներ, ինչ են կարծում փորձագետները» քննարկման ժամանակ, որին մասնակցում էր նաև ՍԴ նախագահ Գագիկ Հարությունյանը, Գյումրու «Ասպարեզ» ակումբի ղեկավար Լևոն Բարսեղյանը հարց ուղղեց բանախոսներին, թե՝ կարո՞ղ է սահմանադրական բարեփոխումներ իրականացնել մի ռեժիմ, որ իշխանության է եկել զանգվածային ընտրակեղծիքների, ընտրակաշառքի և ցուցարարներին սպանելու միջոցով:
Հարցին պատասխանեց Վարշավայի համալսարանի Մարդու իրավունքների ամբիոնի պրոֆեսոր Միրասլավ Վուրզուկովսկին, ով հիշեցնելով որոշ երկրների փորձը՝ ասաց. «Այո, դա հնարավոր է»: Նրա խոսքով՝ հնարավոր է, որ տարբեր ռեժիմներ սահմանադրական փոփոխություններով նոր պրոցես սկսեն ու փոխեն երկրում իրավիճակը դեպի ժողովրդավարացում: Վուրզուկովսկին բերեց 1989թ.-ի Լեհաստանի օրինակը, երբ տեղի ռեժիմը ընդդիմության՝ «Սոլիդարնոստ» շարժման հետ որոշեց միասնական լուծում գտնել, և դա բերեց սահմանադրական հսկայական փոփոխությունների: Վուրզուկովսկին հիշեց նաև Մյանմար պետության օրինակը, երբ երկխոսություն և բարեփոխում սկսվեց Մյանմարի ռազմական ռեժիմի նախաձեռնությամբ, քանի որ այնտեղ զինվորական իշխանություն է:
Բանախոսներին հարց ուղղած Լևոն Բարսեղյանից հետաքրքրվեցինք՝ բավարարվա՞ծ է հարցի պատասխանից: «Իմ հարցը տեսական էր»,- ասաց Բարսեղյանը՝ հավելելով. «Ասվեց, որ դա հնարավոր է լինում ընդդիմության հետ համագործակցությամբ, սակայն դա այժմ ոչ մի դեպքում Հայաստանի վրա տրանսֆորմացնել չենք կարող, որովհետև Հայաստանում ոչ ընդդիմություն կա՝ ըստ էության, ոչ էլ ընդդիմության հետ հնարավոր համագործակցություն: Ընդդիմությունը շատ թույլ է»: