ՆԱՏՕ-ն կմեծացնի աջակցությունն Ուկրաինային և իր արևելյան գործընկերներին: Այս մասին այսօր «Անվտանգության նոր մարտահրավերները և ՆԱՏՕ-ն» միջազգային գիտաժողովի շրջանակներում ասաց ՆԱՏՕ-ի Հանրային դիվանագիտության վարչության ներկայացուցիչ Դեսպինա Աֆենտուլին՝ անդրադառնալով ՆԱՏՕ-ՀՀ համագործակցության քսանամյակին:
Նա նշեց, որ միջազգային անվտանգությունը համագործակցությունն է միջազգային բեմի բոլոր խաղացողների հետ, քաղաքների, երկրների, կազմակերպությունների, քաղաքացիական հասարակության հետ: Դեսպինա Աֆենտուլին ներկայացրեց, թե որքան կարևոր է լինելու ՆԱՏՕ-ի ապագա ռազմավարության համար առաջիկայում Ուելսում կայանալիք գագաթնաժողովը:
«Մենք նշում ենք խաղաղության գործընկերության քսանամյակը։ Հայաստանը գործընկերությանը միացել է ամենասկզբից՝ իր անկախության առաջին իսկ տարվանից, և մենք միշտ ունեցել ենք լավ համագործակցություն Հայաստանի հետ անհատական գործընկերության գործողությունների ծրագրի շրջանակում, գործընկերություն բոլոր մակարդակներում՝ ռազմական, քաղաքական, հանրային դիվանագիտություն, քաղաքացիական աջակցություն: Ուստի խաղաղության գործընկերությունը շարունակում է լինել շատ հաջողակ ծրագիր 40 երկրների հետ հարաբերությունների համար: «Գործընկերություն հանուն խաղաղության» ծրագիրը ձևավորվել է նաև հաջակցություն ՆԱՏՕ-ի ընդլայնման՝ դրանով իսկ Եվրոպան ազատ ու միավորված դարձնելով: Սա մեր ձեռքբերումն է, և պետք է պահպանվի ամեն դեպքում»,- նշեց նա:
Ապա անդրադառնալով աշխարհաքաղաքականությանն ու ուկրաինական ճգնաժամին՝ Աֆենտուլին ասաց, որ ՌԴ գործողություններն իրական սպառնալիք են միջազգային իրավունքի համար, որը հիմնված է հարգանքի, բոլոր երկրների տարածքային ամբողջականության վրա: Ըստ նրա՝ վերջին 20 տարիների ընթացքում ՆԱՏՕ-ն լուրջ ջանքեր է ներդրել Ռուսաստանի վստահությունը ձեռք բերելու, համագործակցության և նրա հետ միջազգային հարաբերությունների նույն տեսլականը կիսելու ուղղությամբ, բայց Ռուսաստանն ընտրել է առճակատման ուղին՝ ՆԱՏՕ-ին դիտարկելով որպես ռազմավարական մրցակից: Նա նաև ասաց, որ ուելսյան գագաթնաժողովի ընթացքում համակարգվելու են այն բոլոր դասերը, որոնք ստացվել են վերջին զարգացումների հետևանքով: ՆԱՏՕ-ի ներկայացուցիչն ասաց, որ իրենց առաջնահերթությունը Եվրոպայի անվտանգությունն ապահովելն է:
«Մենք պետք է խորացնենք մեր համագործակցությունը արևելյան հարևանների հետ: Մենք մեծացնելու ենք աջակցությունն Ուկրաինային ու մեր այլ արևելյան գործընկերներին: Բայց մենք մեր դռները նաև բաց պետք է պահենք նոր երկրների համար»,- ասաց նա:
Առաջարկում ենք մանրամասներին ծանոթանալ տեսանյութի միջոցով: