Հայաստանի վարչապետ Հովիկ Աբրահամյանը երեկ Շիրակի մարզ կատարած այցի ընթացքում «Ազատության» հետ զրույցում ասել էր, թե Եվրասիական տնտեսական միությանը միանալու ժամկետը կհստակեցվի Սոչի կատարած այցից հետո:
Հիշեցնենք, որ այսօր Հայաստանի վարչապետ Հովիկ Աբրահամյանը մեկնում է Սոչի՝ հանդիպելու ռուսաստանցի գործընկերոջ՝ Դմիտրի Մեդվեդևի հետ:
«Առաջին լրատվական»-ի հետ զրույցում ռուսաստանցի հայտնի քաղաքագետ, REX գործակալության ղեկավար Մոդեստ Կոլերովը, սակայն, այլ կարծիքի է: Նրա խոսքով՝ վարչապետ Հովիկ Աբրահամյանի այցից հետո չի հստակեցվի ո՛չ Եվրասիական տնտեսական միությանը Հայաստանի միանալու ժամկետը, ո՛չ էլ ստորագրվելիք փաստաթղթի բովանդակությունը:
«Անկասկած, երկու երկրների վարչապետները պետք է և կարող են քննարկելՀայաստանի՝ Եվրասիական տնտեսական միությանը անդամակցելու հետ կապված հարցեր, բայց Ռուսաստանի, Բելառուսի և Ղազախստանի համար այս պահին առաջին հարցն այդ երկրների խորհրդարանների կողմից Եվրասիական տնտեսական միությանը միանալու փաստաթղթի վավերացումն է, այսինքն՝ Եվրասիական տնտեսական միությունը նախ և առաջ պետք է վավերացվի որպես օրինական ակտ, նոր հետո Հայաստանը անդամակցի Եվրասիական միությանը»:
Միևնույն ժամանակ Կոլերովը հայտարարեց, որ Հայաստանը այդ միությանը կանդամակցի ոչ թե չորսի, այլ 3+1 ֆորմատով. «Հավելեմ նաև, որ Հայաստանի պայմանագրի տեքստի քննարկումը ավելի շատ եվրասիական կոմիտեի քննարկման տիրույթում է: Այդ կոմիտեն է քննարկում Հայաստանի կողմից ներկայացված պայմանագիրը, և հետո երեք երկրների ներկայացուցիչների կողմից առաջարկվում է այդ պայմանագիրը հաստատել»:
Կոլերովն ընդգծեց, որ հասկանալի է՝ Ռուսաստանի ղեկավարության դիրքը կարևոր է այստեղ, բայց ո՛չ ստորագրման ժամկետը, ո՛չ էլ վերջնական փաստաթղթի տեքստը Ռուսաստանը չի որոշում:
Նրա խոսքերով՝ Հովիկ Աբրահամյանի հայտարարությունը՝ Ռուսաստան կատարվելիք այցի և Դմիտրի Մեդվեդևի հետ հանդիպման մասին, կրում են ընդհանուր տեսական բնույթ և գործնական նշանակություն չունեն. «Այդ այցելությունից կախված չէ ո՛չ ստորագրման հեռանկարը, ո՛չ ժամկետը, ո՛չ էլ ստորագրվելիք փաստաթղթի տեքստը»:
Նա բնական համարեց այն, որ Աբրահամյանն այս այցն ուզում է կարևորել, բայց Հայաստանի՝ Եվրասիական տնտեսական միությանն անդամակցելու հետ այն ուղղակի առնչություն չունի:
