Ինչպես հայտնի է, ՕԵԿ-ը հուլիսի 18-ին «հուժկու, համազգային և փայլուն» սոցիալական հանրահավաք է հրավիրել, որը նվիրված է լինելու էլեկտրաէներգիայի թանկացմանը: ՕԵԿ-ը հրապարակային առաջարկել է քաղաքական ուժերին, հասարակական կազմակերպություններին ու անհատներին ներկա գտնվել հանրահավաքին: Եվ արդեն իսկ ինչպես քաղաքական թևից, այլնպես էլ հասարակական, քաղաքացիական սեկտորից նկատելի են առաջին արձագանքները:
Քաղաքական կուսակցություններն արդեն այս կամ այն ձևով արտահայտել են իրենց դիրքորոշումը ընդամենը 3 ամիս առաջ թունդ իշխանությունից թունդ ընդդիմադիր դարձած ՕԵԿ-ի հանրահավաքի և դրան իրենց մասնակցության հարցի վերաբերյալ: ԱԺ «Հանրապետական» խմբակցության ղեկավարը հեգնել էր, թե օրը հարմար չէ ընտրված, հակառակի պես ինքն այդ օրը գործեր ունի և չի կարող մասնակցել: Քառյակն իր հերթին ասել է, որ իր կազմած ձևաչափով մասնակցություն հանրահավաքին չի լինելու: Քառյակի անդամ կուսակցությունների ներկայացուցիչները հանրահավաքին կարող են մասնակցել որպես անհատ քաղաքացիներ:
Բացի դա, դատելով հատկապես այսօրվա ասուլիսից հետո Արթուր Բաղդասարյանի և ՕԵԿ-ի հասցեին կատարվող գրառումներից` կարելի է ենթադրել, որ հասարակական սեկտորն էլ առանձնապես ոգևորված չէ ՕԵԿ-ով: Նրանց հիշողության մեջ դեռ թարմ է, որ ընդամենը ոչ վաղ անցյալում նույն ՕԵԿ-ը մեծ պատրաստակամությամբ քվեարկում էր գազի թանկացման, կուտակայինի օրենքի և իշխանությունների մի շարք այլ նախաձեռնությունների տակ:
Հետևաբար, չնայած Արթուր Բաղդասարյանը կանխատեսում է, որ բավական հզոր հանրահավաք են ունենալու, քանի որ ժամանակին իրենք 100 հազար ձայն են հավաքել, բայց հաշվի առնելով վերը նշված հանգամանքները, ՕԵԿ-ի հանդեպ հասարակության հակակրանքը, գումարած հուլիսյան շոգը` կարելի է ենթադրել, որ կուսակցության հանրահավաքն այդքան էլ «փայլուն» չի լինի:
Այլևս չստանալով նախկին կոալիցիոն կուսակցության երբեմնի աջակցությունը` ՕԵԿ-ը փորձում է սեփական ուժերով և ռեսուրսներով ավտոբուսներով «մարդ բերել» հանրահավաքին: Մարզերից արդեն իսկ արձագանքներ կան, որ ՕԵԿ-ը լծվել է հանրահավաքի պոտենցիալ մասնակիցների ցուցակագրման գործին, որպեսզի հանրահավաքի օրը ավտոբուսներով բերի Երևան: «Հա, արդեն ձեռուոտ են ընգել, մարդ են ման գալիս, ծրագիր են ցույց տալիս, հանրահավաքի ռեկլամն են անում»,-մեզ հետ զրույցում ասաց գյումրեցիներից մեկը՝ հավելելով, որ ինքը չի գնալու:
«Առաջին լրատվական»-ի ճշտող հարցին` ցուցակագրելուց բացի, այլ խոստումներ տրվո՞ւմ են, մասնավորապես փողային առաջարկներ եղե՞լ են, մեր զրուցակիցն արձագանքեց. «Տենց բան չեմ լսել, բայց դա էլ կանեն, ինչ է եղել որ: Բա ոնց պետք ա հրապարակը լցնեն, թե չէ, ձեր կարծիքով, հենց ընենց ով կգնա ՕԵԿ-ի, Արթուր Բաղդասարյանի հետևից»:
Նշենք, որ մարդկանց ավտոբուսներով բերելու մասին խոսակցություններ Շիրակից բացի, կան նաև այլ մարզերում` Կոտայքում, Արմավիրում, Արագածոտնում: Արթուր Բաղդասարյանը նույնիսկ իր գործարանի աշխատակիցներին է հանձնարարել կազմ-պատրաստ ներկայանալ հանրահավաքին:
Այս ամենից կարելի է ենթադրել, որ Արթուր Բաղդասարյանը խնդիր է դրել հատկապես քառյակին ապացուցելու, թե ով է իրական ընդդիմությունը: Մանավանդ, որ այսօրվա իր ասուլիսում Բաղդասարյանն արդեն իսկ քար էր գցում քառյակի բոստանը՝ հայտարարելով, որ եթե քառյակը պարզապես խոսում է, ապա իրենք գործնական քայլեր են նախաձեռնում: «Քառյակը խոսում է հոսանքի թանկացումից, ՕԵԿ-ը դիմել է վարչական դատարան և այդ հարցով հանրահավաք է կազմակերպում: Քառյակը խոսում է կենսաթոշակային բարեփոխումների մասին, ՕԵԿ-ը շրջանառության մեջ է դրել պահանջ՝ ամբողջությամբ հանել պարտադիր բաղադրիչը: Եվ այսպես մի շարք հարցեր»,- հայտարարեց նա:
Այլ կերպ ասած` այս հանրահավաքով ՕԵԿ-ը կհանձնի ընդդիմություն դառնալու իր առաջին քննությունը: Կհավաքի շատ մարդ` մարտահրավեր կնետի քառյակին ու կդառնա ընդդիմադիր դաշտի մասնիկ, չի հավաքի՝ կշարունակի մնալ ՀՀԿ-ի կցորդը:
