ՀՀ կառավարությունը բավական յուրօրինակ է վերաբերվում սեփական կառույցների որոշումներին: Կառավարության առաջիկա նիստում հավանության է արժանանալու էկոնոմիկայի նախարար Կարեն Ճշմարիտյանի ներկայացրած նախագիծը, որով կառավարությունը մոտ 1 մլրդ 324 մլն դրամի իտալական սարքավորումների ներմուծման կապակցությամբ երեք տարի ժամկետով հարկային արտոնություն է տրամադրելու «Ա և Գ» ընկերությանը, որը պատկանում է Ազգային ժողովի «Հանրապետական» խմբակցության պատգամավոր, գործարար Սամվել Ալեքսանյանին:
Ուշագրավն այն է, որ, ինչպես ժամանակին պարզել էր hetq.am-ը, ՀՀ տնտեսական մրցակցության պաշտպանության հանձնաժողովը 2010-2011թթ. դիմել էր դատարան՝ այդ օղիներն արգելելու պահանջով, քանի որ դրանք շփոթության աստիճան նման էին Ռուսաստանում և Ուկրաինայում արտադրվող օղիներին: 2012թ. ասուլիսում ՀՀ արդարադատության նախարարության Դատական ակտերի հարկադիր կատարման ծառայության պետ Միհրան Պողոսյանը լրատվամիջոցներին ասել էր, որ բոլոր արգելված օղիները շրջանառությունից հանել է, ընդ որում՝ առգրավել է ոչ միայն պատրաստի արտադրանքը, այլև արտադրության ռեսուրսները՝ շշերը, խցանները, պիտակները, արտադրության միջոցները: Սակայն որոշ ժամանակ անց արգելված օղիները կրկին հայտնվեցին «Երևան Սիթի»-ում՝ փոխվել էր արտադրողի անունը. նախկինում արգելված օղիներն արտադրվում էին «ԱԳ» ընկերության անունից, այժմ դրանք արտադրում է «Ա և Գ» ընկերությունը:
Կառավարության որոշման նախագծի հիմնավորման մեջ նշվում է, որ ներդրումային ծրագրի շրջանակներում «Ա և Գ» ընկերությունը նախատեսում է սպիրտի արտադրության տեխնոլոգիական պրոցեսների արդյունավետությունը և թողարկվող սպիրտի որակը ու քանակը բարձրացնելու նպատակով Երևանի Արշակունյաց 127/21 հասցեում տեղադրել սպիրտի արտադրության նոր միջազգային չափորոշիչներին համապատասխան սարքավորումներ: Ներդրումային ծրագրի շրջանակներում` սպիրտի արտադրության տեխնոլոգիական պրոցեսների արդյունավետությունը և թողարկվող սպիրտի որակը ու քանակը բարձրացնելու նպատակով ընկերությունը նախատեսում է շուրջ 1.32 մլրդ ՀՀ դրամի չափով ներդրումներ իրականացնել: Վերոնշյալ ներդրումների շնորհիվ հնարավոր կլինի ներդնել իտալական արտադրությամբ ժամանակակից սարքավորումներ, ինչի միջոցով ընկերությունը նախատեսում է արտադրել տարեկան շուրջ 20.1 մլրդ դրամի արտադրանք (2015թ.), որի շուրջ 25%-ը կարտահանվի ՌԴ, Իրաք և Վրաստան:
Ներդրումային ծրագրի իրագործման արդյունքում նախատեսվում է ստեղծել մոտ 40 աշխատատեղ` միջին աշխատավարձը 110 հազար դրամով:
