2013 թ. Եվրամիությունը Մոլդովային կտրամադրի ավելի քան 100 միլիոն եվրոյի չափով ֆինանսական օգնություն: Այս մասին հաղորդում է RBK-ն՝ վկայակոչելով Մոլդովայի արտաքին գործերի նախարար և եվրոպական ինտեգրման փոխնախարար Նատալյա Գերմանին:
Գերմանի խոսքերով՝ այս տարի ԵՄ-ը Մոլդովային հատկացրել է 122 միլիոն եվրո, որից 28 միլիոն եվրո հատկացվել է հավելյալ ՝ հաշվի առնելով բարեփոխումների իրականացման արագացված տեմպերը՝ more for more սկզբունքին համապատասխան:
Նշենք, որ Մոլդովան ճանաչվել է բարեփոխումների առաջատար Արևելյան համագործակցության երկրների շարքում և ստացել է ամենաշատ ֆինանսական օգնությունը բնակչության մեկ շնչի համար:
Գերմանը հույս է հայտնել, որ 2013թ. նոյեմբերին Վիլնյուսում կայանալիքս Արևելյան համագործակցության գագաթնաժողովի ընթացքում Մոլդովան համաձայնագիր կստորագրի ԵՄ-ին անդամակցելու վերաբերյալ:
Ավելի վաղ Մոլդովայում ԵՄ պատվիրակության ղեկավար Դիրկ Շուբելը հայտարարել է, որ 2013 թ. ԵՄ-ը կմեծացնի Մոլդովային հատկացվող ֆինանսական օգնությունը վերջինիս կողմից իրականացվող բարեփոխումների տեմպերի արագացման դեպքում: