Մեկուկես ժամ սպասելուց ու մի քանի զանգերից հետո ի վերջո տաքսի-ծառայությունների կարգավորման դաշտից դժգոհող ակցիայի մասնակիցներին լսելու եկավ տրանսպորտի և կապի նախարարության տրանսպորտի վարչության պետի տեղակալ Դավիթ Մելքոնյանը:
Վերջինս լրագրողներին տեսնելով՝ զարմացավ. «Ժողովուրդ ջան, մի հատ հասկանանք, էլի, մենք եկել ենք լրագրողների՞ հետ հանդիպման, թե՞ տաքսու վարորդների, ձեզ որևէ մեկ ասե՞լ է, որ ձեզ հետ հանդիպելու ենք»: Լրագրողները հիշեցրին, որ Մելքոնյանը ակցիայի է եկել:
Ի վերջո նախարարության ներկայացուցիչը ասաց, որ լրագրողների հարցերին կպատասխանի բողոքողներին լսելուց հետո՝ նշելով, որ դաշտը կարգավորող նոր օրենքը ԱԺ-ում անցել է երկու ընթերցում, այն կհանգեցնի համակարգային փոփոխությունների, 3-րդ ընթերցումից հետո օրենքն ուժի մեջ կմտնի: Ակցիայի մասնակիցները պահանջեցին, որ օրենքները գործեն և դեղին պետհամարանիշները չհանվեն:
Ակցիայի մասնակից անհատ վարորդներից մեկը նշեց, որ օրենսդրական դաշտը պետք է արագ կարգավորվի, քաշքշուկների մեջ են, մինչդեռ երբ խոսքը վերաբերում էր պատգամավորների աշխատավարձերին, մի-երկու օրում արագ կոճակները սեղմում էին:
Արդեն լրագրողների հետ Դավիթ Մելքոնյանը նկատեց, որ նոր օրենքը դաշտը կկարգավորի. բոլորն աշխատելու են մեկ սկզբունքով, նախուղերթային բուժզննումն ու տեխզննումը հանվելու են, և դեղին պետահամարնիշներն այլև չեն օգտագործվելու, լինելու են սպիտակները: Իսկ փոփոխություններ այժմ չեն կարող կատարել, նպատակահարմար չէ, օրենքի ընդունումից հետո պատրաստ են քննարկել մանր փոփոխությունների հարցը:
«Առաջին լրատվականի» հարցին՝ կապված ապահովագրական բեռի հետ, Մելքոնյանը արձագանքեց. «Ապահովագրական բեռի մասով, կներեք, ես չէի ցանկանա պատասխանել»:
Առավել մանրամասն՝ տեսանյութում: