Տարեց բելգիացին իր համար անսպասելիորեն հայտնաբերել է, որ 19 տարի միասեռ ամունությամբ է ապրել. նրա կինն իրենից թաքցրել է, որ տղա է ծնվել և փոխել է սեռը: Եվրոպացին դժվարությամբ է կարողացել համակերպվել այդ մտքին. հենց որ կինը նրան ասել է այդ մասին, ամուսինը նրան ծեծել է: Հետո, սակայն, պարզվել է, որ շրջապատում բոլոր մյուսների համար դա գաղտնիք չի եղել. միայն ամուսնուն են խաբել:
«Ես զգացի, որ ինձ բռնաբարել են»,- խոստովանել է 64-ամյա տղամարդը Nieuwsblad.be թերթին տված հարցազրույցում: Ամուսնությունը տղամարդու համար երրորդն է եղել: Սկզբում նա շատ երջանիկ է եղել և մտածել, որ այլևս չի բաժանվի:
Թերթն իր հերոսների համար անուններ է հորինել` բելգիացուն` Յան, իսկ նրա կնոջը` Մոնիկա: Նախկին տղամարդ Մոնիկան ծնունդով Ինդոնեզիայից է։ Բելգիայում տնտեսության մեջ օգնել է Յանի ծանր հիվանդ քրոջը: Հետո Մոնիկան այցագրի հետ կապված խնդիրների պատճառով վերադարձել է հայրենիք: Սակայն շուտով երեխաների հարցում Յանն է օգնության կարիք ունեցել. նրանից հեռացել է կինը: Այդ ժամանակ նա հրավիրել է Մոնիկային, լուծել փաստաթղթերի հետ կապված նրա խնդիրներն ու նրան տեղավորել իր տանը: Շուտով նրանց միջև կրակ է բռնկվել ու նրանք ամուսնացել են:
Ամուսնանալու պահին Մոնիկան 27 տարեկան է եղել, ամուսինը` 44: 4 երեխաների հայր Յանը հետաքրքրվել է` չի՞ ուզում Մոնիկան մայրանալ: Մոնիկան հրաժարվել է, ինչը լիովին ձեռնտու է եղել բելգիացուն:
Մոնիկան իրեն պահել է սովորական կնոջ պես, որը կարող է, սակայն չի ուզում երեխա ունենալ, հակաբեղմնավորիչներ է օգտագործել, ձևացրել, թե դաշտան է ունենում: Յանը ոչինչ չի կասկածել. նա Մոնիկայի մեջ տեսել է առանց տղամարդկային գծերի գրավիչ կնոջ և ուրախացել, որ իր երրորդ կինը լավ հարաբերությունների մեջ է երեխաների հետ: Նա իր ամուսնությունը երջանիկ է համարել:
Սակայն վերջին տարում ամեն ինչ փոխվել է: Մոնիկան մշտական աշխատանք է գտել և սկսել է «գերկարճ կիսաշրջազգեստներով ու փոքր տոպերով» դիսկոտեկներ այցելել: Շշուկներ են տարածվել, որ Մոնիկան երբևէ տղամարդ է եղել: Յանը չի կարողացել դա հանդուրժել և որոշել է խոսել կնոջ հետ: Միայն այդ ժամանակ է Մոնիկան խոստովանել, որ տղա է ծնվել: Արդյունքում` վեճ է սկսվել, հարևանները ոստիկանություն են կանչել:
Յանն ու նրա երեխաները ապշել են. բելգիացին խոստովանել է, որ սկզբում ընդհանրապես չի կարողացել խոսել այդ մասին, ստիպված դիմել է բժշկի, որպեսզի դիմանա այդ հարվածին: Սերն այսքանով վերջացել է, սակայն ամուսնական կյանքը շարունակվում է: Չնայած Յանը կարողացել հասնել բաժանության` դատարանը ճանաչել է Յանի տանն ապրելու Մոնիկայի իրավունքը: Չնայած նախկին ամուսիններն ապրում են նույն հարկի տակ` իրար հետ ոչ մի բառ չեն փոխանակում,- նշում է Flanders News.be-ն:
«Ես այլևս չեմ ուզում նրա հետ գործ ունենալ: Այն, ինչ նա արել է ինձ և իմ ընտանիքի հետ, աններելի է»,- եզրափակել է Յանը:
